ក្រសួងថាមពលអ៊ុយក្រែន បាននិយាយថា ការវាយប្រហាររបស់រុស្ស៊ី នៅយប់ថ្ងៃពុធ (៧ មករា) បានបំផ្លាញបណ្ដាញផ្គត់ផ្គង់ថាមពលស្ទើរតែទាំងស្រុងនៅក្នុងតំបន់ចំនួន២ នៃភាគអាគ្នេយ៍អ៊ុយក្រែន ស្របពេលសីតុណ្ហភាពធ្លាកចុះយ៉ាងត្រជាក់នៅរដូវរងា។

របាយការណ៍ក្នុងស្រុកបានឱ្យដឹងថា មន្ទីរពេទ្យ និងទីតាំងសំខាន់ៗផ្សេងទៀតនៅក្នុងតំបន់ដែលរងផលប៉ះពាល់ កំពុងដំណើរការដោយថាមពលបម្រុង។ ក្រុមសង្គ្រោះបន្ទាន់កំពុងប្រឹងប្រែងពេញមួយយប់ ដើម្បីស្តារអគ្គិសនី ទឹក និងថាមពលកម្ដៅឡើងវិញ ដែលក៏ត្រូវបានរំខានផងដែរ ក្រោមអាកាសធាតុរដូវរងាដ៏កំណាចនៅក្នុងឆ្នាំនេះ។

ក្រសួងថាមពលអ៊ុយក្រែន បាននិយាយក្នុងសេចក្តីថ្លែងការណ៍មួយលើកម្មវិធីតេលេក្រាមថា “ជាលទ្ធផលនៃការវាយប្រហារនេះ តំបន់ Dnipropetrovsk និង Zaporizhzhia នៃភាគអាគ្នេយ៍ ស្ទើរតែគ្មានអគ្គិសនីប្រើប្រាស់ទាំងស្រុង”។ នាយករដ្ឋមន្ត្រីអ៊ុយក្រែន លោកស្រី Yulia Svyrydenko បាននិយាយថា ព្រិលធ្លាក់យ៉ាងក្រាស់ឃ្មឹក និងសីតុណ្ហភាពធ្លាក់ចុះដល់ -២០អង្សាសេ នៅពេលយប់ ទំនងជានឹងធ្វើឱ្យបណ្ដាញអគ្គិសនី និងប្រព័ន្ធកម្ដៅរអាក់រអួលកាន់តែខ្លាំង៕