លោកជំទាវអភិបាលខេត្តកោះកុង បាននឹងកំពុងប្រឹងប្រែងសម្របសម្រួលជាមួយភាគីថៃ ដើម្បីឱ្យមានការដោះលែងប្រជានេសាទចំនួន៤នាក់ ក្រោយការឃាត់ខ្លួន ករណីនេសាទចូលដែនសមុទ្រ។
ការអះអាងបែបនេះរបស់លោកជំទាវ ឈី វ៉ា បានធ្វើឡើងក្នុងពិធីសំណេះសំណាលជាមួយប្រជានេសាទ រសៀលថ្ងៃទី៧ខែមករា ស្វែងយល់ពីសុខទុក្ខ និងផ្ដល់ការណែនាំសំខាន់ៗលើការងារសន្តិសុខ និងសុវត្ថិភាពសមុទ្រ។
លោកជំទាវអភិបាលខេត្តកោះកុង បានបន្ថែមទៀតថា ប្រជានេសាទអាចរកទិន្នផលនេសាទក្បែរៗច្រាំងសិន ដោយសារស្ថានភាពព្រំដែនបច្ចុប្បន្នកំពុងមានភាពតានតឹង សុំកុំទាន់ចេញទៅនេសាទឆ្ងាយ ឬក្បែរបន្ទាត់ព្រំដែន និងក្បែរតំបន់កងទ័ពជើងទឹកប្រទេសជិតខាងពេក។ ទោះបីការប្រកបរបរមានសារៈសំខាន់សម្រាប់ជីវភាពក៏ដោយ ប៉ុន្តែអាយុជីវិតគឺសំខាន់បំផុត។
ទន្ទឹមនោះដែរ លោកជំទាវ ឈី វ៉ា ក៏អំពាវនាវដល់ប្រជានេសាទចូលរួមចុះបញ្ជីទូកស្របច្បាប់ តាមគោលការណ៍ច្បាប់។ ការធ្វើបែបនេះ មិនត្រឹមតែដើម្បីភាពស្របច្បាប់ប៉ុណ្ណោះទេ ប៉ុន្តែវាក៏ជាផ្នែកមួយនៃការគ្រប់គ្រងសន្តិសុខ និងការពារផលប្រយោជន៍របស់បងប្អូនប្រជានេសាទខ្លួនឯងផងដែរ។
លោកជំទាវអភិបាលខេត្ត បានសង្កត់ធ្ងន់ឱ្យបងប្អូនប្រជានេសាទទាំងអស់ បន្តជឿជាក់លើការដឹកនាំរបស់រាជរដ្ឋាភិបាល និងអាជ្ញាធរដែនដី ដើម្បីរួមគ្នាថែរក្សាសុខសន្តិភាព និងស្ថិរភាពនៅតាមតំបន់សមុទ្រយើង និងប្រទេសជាតិយើង ឱ្យបានគង់វង្ស៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
