អ្នកនាំពាក្យសេតវិមាន លោកស្រី Karoline Leavitt បាននិយាយថា សេតវិមានសង្ឃឹមថា លោកប្រធានាធិបតី ដូណាល់ ត្រាំ នឹងអាចបន្ត «ទំនាក់ទំនងផ្ទាល់ខ្លួន» ល្អជាមួយប្រធានាធិបតីរុស្ស៊ី លោក វ្ល៉ាឌីមៀ ពូទីន និងប្រធានាធិបតីចិន លោក ស៊ី ជីនពីង ទោះបីជាមានសកម្មភាពរបស់ទីក្រុងវ៉ាស៊ីនតោនប្រឆាំងនឹងប្រទេសវ៉េណេស៊ុយអេឡាក៏ដោយ។  

នៅពេលសួរអំពីសកម្មភាពរបស់សហរដ្ឋអាមេរិកប្រឆាំងនឹងប្រទេសវ៉េណេស៊ុយអេឡា និងការរឹបអូសដោយសហរដ្ឋអាមេរិកនូវនាវាដឹកប្រេង Marinera ដែលមានទង់ជាតិរុស្ស៊ីអាចប៉ះពាល់ដល់ទំនាក់ទំនងរបស់ទីក្រុងវ៉ាស៊ីនតោនជាមួយទីក្រុងមូស្គូ និងទីក្រុងប៉េកាំងឬយ៉ាងណា លោកស្រីបានប្រាប់សន្និសីទសារព័ត៌មានមួយថា៖«ខ្ញុំគិតថា លោកប្រធានាធិបតីមានទំនាក់ទំនងបើកចំហ ស្មោះត្រង់ និងល្អជាមួយទាំងលោកប្រធានាធិបតី ពូទីននៃប្រទេសរុស្ស៊ី និង លោកប្រធានាធិបតី ស៊ី ជីនពីងនៃប្រទេសចិន។ លោក ត្រាំ បាននិយាយជាមួយពួកគេច្រើនដង ដូចដែលអ្នកបានដឹងហើយថា ចាប់តាំងពីឡើងកាន់តំណែងប្រហែលមួយឆ្នាំមុន ហើយខ្ញុំជឿថា ទំនាក់ទំនងផ្ទាល់ខ្លួនទាំងនោះ នឹងបន្ត»។  

យ៉ាងណាក៏ដោយ យោងតាមលោកស្រី Leavitt លោក ត្រាំ នឹង «អនុវត្តគោលនយោបាយរបស់យើងដែលល្អបំផុតសម្រាប់សហរដ្ឋអាមេរិក»។ លោកស្រី បាននិយាយថា៖«ទាក់ទងនឹងការរឹបអូសនាវាទាំងនេះ នោះមានន័យថា ត្រូវអនុវត្តការហាមឃាត់នាវាកងនាវាងងឹតទាំងអស់ដែលកំពុងដឹកជញ្ជូនប្រេងវ៉េណេស៊ុយអេឡា ដោយខុសច្បាប់ ហើយមានតែពាណិជ្ជកម្មស្របច្បាប់ ដែលកំណត់ដោយសហរដ្ឋអាមេ  រិកប៉ុណ្ណោះ ដែលនឹងត្រូវបានអនុញ្ញាត»។

លោកស្រី Leavitt សង្កត់ធ្ងន់ថា៖«នោះគឺជាគោលនយោបាយរបស់រដ្ឋបាលនេះ ហើយលោក ត្រាំ មិនខ្លាច ក្នុងការអនុវត្តវាទេ»៕