ប្រធានាធិបតីអាល្លឺម៉ង់ លោក Frank-Walter Steinmeier បានរិះគន់យ៉ាងខ្លាំង ចំពោះគោលនយោបាយការបរទេសរបស់សហរដ្ឋអាមេរិក ក្រោមការដឹកនាំរបស់ប្រធានាធិបតី លោក Donald Trump ហើយបានជំរុញឲ្យបណ្ដាប្រទេសជុំវិញពិភពលោក កុំបណ្ដោយឲ្យសណ្តាប់ធ្នាប់ពិភពលោកបែកបាក់ទៅជា «កន្លែងជ្រកកោនរបស់ជនទុច្ចរិត» ជាទីដែលមនុស្សគ្មានសីលធម៌យកអ្វីក៏បានតាមដែលពួកគេចង់។

នៅក្នុងសុន្ទរកថារិះគន់ខ្លាំងៗមិនធម្មតាមមួយ ដែលហាក់ដូចជាសំដៅទៅលើវិធានការនានា ដូចជាការទម្លាក់ប្រធានាធិបតីវ៉ណេស៊ុយអេឡា លោក Nicolas Maduro កាលពីចុងសប្តាហ៍ អតីតរដ្ឋមន្ត្រីការបរទេសរូបនេះ បានសង្កត់ធ្ងន់ថា លទ្ធិប្រជាធិបតេយ្យសកល កំពុងត្រូវបានវាយប្រហារ ដែលមិនធ្លាប់មានពីមុនមក។ ទោះបីជាតួនាទីរបស់ប្រធានាធិបតីអាល្លឺម៉ង់ភាគច្រើន គ្រាន់តែជាពិធីការក៏ដោយ ក៏ពាក្យសម្ដីរបស់លោកមានទម្ងន់ខ្លះ ហើយលោកមានសេរីភាពក្នុងការបញ្ចេញមតិច្រើនជាងអ្នកនយោបាយ។

ដោយពិពណ៌នាអំពីការបញ្ចូលជាដែនដីឧបសម្ព័ន្ធនូវឧបទ្វីបគ្រីម៉ា និងការឈ្លានពានទ្រង់ទ្រាយធំលើអ៊ុយក្រែនពីសំណាក់រុស្ស៊ីថា ជាចំណុចរបត់មួយនោះ លោក Steinmeier បាននិយាយថា អាកប្បកិរិយារបស់សហរដ្ឋអាមេរិកតំណាងឲ្យការបែកបាក់ជាប្រវត្តិសាស្ត្រលើកទី២។

នៅក្នុងសុន្ទរកថា កាលពីល្ងាចថ្ងៃពុធ (ទី៧ ខែមករា ឆ្នាំ២០២៦) លោក Steinmeier បានលើកឡើងថា៖ «បន្ទាប់មក មានការរំលោភលើតម្លៃដោយដៃគូសំខាន់បំផុតរបស់យើង គឺសហរដ្ឋអាមេរិក ដែលបានជួយកសាងសណ្តាប់ធ្នាប់ពិភពលោកនេះ»។

លោកបានបន្ថែមថា៖ «វាគឺជាការទប់ស្កាត់កុំឲ្យពិភពលោកប្រែក្លាយទៅជាកន្លែងជ្រកកោនរបស់ជនទុច្ចរិត ជាកន្លែងដែលមនុស្សគ្មានសីលធម៌ទាល់តែសោះយកអ្វីក៏បានតាមដែលពួកគេចង់ ជាកន្លែងដែលបណ្ដាតំបន់ ឬប្រទេសទាំងមូល ត្រូវបានចាត់ទុកថា ជាកម្មសិទ្ធិរបស់ប្រទេសមហាអំណាចមួយចំនួន»៕