យោធារុស្ស៊ី នៅថ្ងៃសុក្រ (ទី៩ ខែមករា ឆ្នាំ២០២៦) នេះ បានប្រាប់ឲ្យដឹងថា ខ្លួនបានបាញ់មីស៊ីលល្បឿនលឿនជាងសំឡេង Oreshnik សំដៅទៅគោលដៅមួយ នៅក្នុងប្រទេសអ៊ុយក្រែន ជាផ្នែកមួយនៃអ្វីដែលខ្លួនបញ្ជាក់ថា ជាការវាយប្រហារដ៏ធំមួយ នាពេលយប់ ទៅលើរោងចក្រថាមពល និងទីកន្លែងផលិតយានដ្រូន នៅទីនោះ។

ក្រសួងការពារជាតិបានឲ្យដឹងនៅក្នុងសេចក្តីថ្លែងការណ៍មួយថា ការវាយប្រហារនេះ គឺជាការឆ្លើយតបទៅនឹងការប៉ុនប៉ងវាយប្រហារដោយយានដ្រូនរបស់អ៊ុយក្រែនទៅលើលំនៅឋានរបស់ប្រធានាធិបតី លោក Vladimir Putin កាលពីចុងខែធ្នូឆ្នាំមុន។

ទីក្រុងគីវបានចាត់ទុកការអះអាងរបស់រុស្ស៊ី ដែលថា ខ្លួនបានព្យាយាមវាយប្រហារលំនៅឋាននៅក្នុងតំបន់ Novgorod របស់រុស្ស៊ីថា ជា «ការនិយាយកុហក»។ អភិបាលតំបន់ Lviv នៅភាគខាងលិចនៃប្រទេសអ៊ុយក្រែន បាននិយាយនៅមុននេះថា ការវាយប្រហាររបស់រុស្ស៊ី បានវាយប្រហារគោលដៅហេដ្ឋារចនាសម្ព័ន្ធ ដែលតាមរបាយការណ៍ពីបណ្ដាញសង្គមដែលមិនត្រូវបានផ្ទៀងផ្ទាត់ បានឲ្យដឹងថា ជាកន្លែងផ្ទុកឧស្ម័នក្រោមដីដ៏ធំមួយ។

គួរបញ្ជាក់ថា ទីក្រុងមូស្គូបានបាញ់មីស៊ីល Oreshnik នេះជាលើកដំបូង លើអ្វីដែលខ្លួនបានប្រាប់ថា ជារោងចក្រយោធាមួយកន្លែងនៅអ៊ុយក្រែន កាលពីខែវិច្ឆិកា ឆ្នាំ២០២៤។ នាពេលនោះ ប្រភពព័ត៌មានអ៊ុយក្រែន បានឲ្យដឹងថា មីស៊ីលនេះផ្ទុកក្បាលគ្រាប់ក្លែងក្លាយ មិនមែនគ្រាប់មានរំសេវផ្ទុះនោះទេ ហើយបណ្តាលឲ្យមានការខូចខាតតិចតួច។

លោក Putin បាននិយាយថា មីស៊ីល Oreshnik រយៈចម្ងាយមធ្យម មិនអាចស្ទាក់ចាប់បានទេ ដោយសារតែល្បឿនរបស់វា ដែលតាមសេចក្ដីរាយការណ៍ថា លឿនជាងសំឡេងជាង ១០ដង ហើយថា អំណាចបំផ្លិចបំផ្លាញរបស់វា គឺអាចប្រៀបធៀបទៅនឹងអាវុធនុយក្លេអ៊ែរ បើទោះជាបំពាក់ដោយក្បាលគ្រាប់ធម្មតាក៏ដោយ៕