លោកនាយករដ្ឋមន្ត្រី Pedro Sanchez បានសរសើរការបើកចំហរបស់អេស្ប៉ាញចំពោះអន្តោប្រវេសន៍ជាគំរូសម្រាប់អឺរ៉ុប ដោយនិយាយថា ការធ្វើបែបនេះ បានផ្តល់អត្ថប្រយោជន៍ដល់សេដ្ឋកិច្ច និងបង្កើនថវិការដ្ឋ។

ខណៈពេលដែលប្រទេសអឺរ៉ុបផ្សេងទៀតបានរឹតបន្តឹងព្រំដែនរបស់ពួកគេប្រឆាំងនឹងអ្នកចំណូលថ្មី ក្រោមសម្ពាធពីគណបក្សស្តាំនិយម អេស្ប៉ាញបានគាំទ្រអន្តោប្រវេសន៍ស្របច្បាប់។

ប្រទេសនេះបានបើកផ្លូវសម្រាប់ជនអន្តោប្រវេសន៍ឲ្យរស់នៅ និងធ្វើការនៅក្នុងប្រទេសនេះដោយស្របច្បាប់ ទោះបីជាមានការជំរុញឲ្យត្រួតពិនិត្យព្រំដែនរបស់ខ្លួន និងរារាំងការធ្វើទេសន្តរប្រវេសន៍មិនទៀងទាត់ក៏ដោយ។

លោក Sanchez បាននិយាយថា ការធ្វើទេសន្តរប្រវេសន៍មានចំនួន ៨០ ភាគរយនៃកំណើនសេដ្ឋកិច្ចរបស់ប្រទេសអេស្ប៉ាញ ក្នុងរយៈពេល ៦ឆ្នាំ កន្លងមក និងមានចំនួន ១០ ភាគរយនៃប្រាក់ចំណូលសន្តិសុខសង្គមរបស់ប្រទេសនេះ។ 

នាយករដ្ឋមន្ត្រីសង្គមនិយមរូបនេះ បានប្រាប់ជំនួបនៃឯកអគ្គរដ្ឋទូតអេស្ប៉ាញ នៅទីក្រុងម៉ាឌ្រីដថា៖«អេស្ប៉ាញនឹងបន្តការពារគំរូអន្តោប្រវេសន៍ដែលកំពុងដំណើរការ ដែលជាដំណើរការមួយសម្រាប់ប្រទេស    អេស្ប៉ាញ និងអាចជួយជំរុញអឺរ៉ុបដែលមានវ័យចំណាស់នេះផងដែរ»

លោក Sanchez បានបន្ថែមថា៖«គំរូរបស់យើងកំពុងដំណើរការ។ ពុំមានអ្វីដែលគេហៅថា «ឥទ្ធិពលអូសទាញទេ» ដោយបដិសេធការអះអាងរបស់អ្នករិះគន់ដែលថា ជំហរគាំទ្រអន្តោប្រវេសន៍របស់អេស្ប៉ាញជំរុញការធ្វើទេសន្តរប្រវេសន៍ខុសច្បាប់ទៅកាន់ប្រទេសនេះ៕