ក្នុងពេលដែលភាពចលាចលប្រឆាំងរដ្ឋាភិបាលអ៊ីរ៉ង់ កំពុងវិវត្តទៅមុខឥតឈប់ឈរ និងសម្ពាធពីបរទេសកើនឡើង ថ្នាក់ដឹកនាំរបស់ទីក្រុងតេអេរ៉ង់ ហាក់ដូចជាមិនអាចដោះស្រាយបានឡើយ ខណៈអ្នកវិភាគព្រមានថា ការតវ៉ាបានប្រែក្លាយជាវិបត្តិនៃភាពស្របច្បាប់របស់សាធារណរដ្ឋអ៊ិស្លាមមួយនេះ។

បាតុកម្ម ដែលចាប់ផ្តើមនៅទីក្រុងតេអេរ៉ង់ កាលពីខែធ្នូកន្លងទៅ ជុំវិញបញ្ហាសេដ្ឋកិច្ចរបស់ប្រទេសនេះ បានរីករាលដាលដល់ខេត្តទាំង៣១ របស់អ៊ីរ៉ង់ទៅហើយ ហើយមនុស្សរាប់សិបនាក់បានស្លាប់ ប៉ុន្តែមិនទាន់ឈានដល់ទំហំនៃភាពចលាចលឆ្នាំ២០២២-២០២៣ នៅឡើយទេ ដែលការតវ៉ានៅពេលនោះ បង្កឡើងដោយការស្លាប់របស់ស្រ្តីម្នាក់ឈ្មោះ Mahsa Amini ក្នុងការឃុំឃាំង ពីបទរំលោភលើក្រមស្លៀកពាក់សាសនាអ៊ិស្លាម។

លោក Alex Vatanka នាយកកម្មវិធីអ៊ីរ៉ង់ នៅវិទ្យាស្ថានមជ្ឈិមបូព៌ា ក្នុងទីក្រុងវ៉ាស៊ីនតោនឌីស៊ី បានលើកឡើងថា «ការដួលរលំនេះមិនត្រឹមតែជាបញ្ហារូបិយបណ្ណអឺរ៉ុង់ប៉ុណ្ណោះទេ ប៉ុន្តែក៏ជាបញ្ហាទំនុកចិត្តផងដែរ» លើភាពស្របច្បាប់របស់របបដឹកនាំ។ លោកសង្កត់ធ្ងន់ថា ការផ្លាស់ប្តូរមើលទៅជៀសមិនរួចទេ ហើយការដួលរលំនៃរបបនេះក៏អាចកើតឡើងដែរ ប៉ុន្តែមិនមានការធានានោះឡើយ។

លោកប្រធានាធិបតីអាមេរិក Donald Trump បាននិយាយរួចមកហើយថា លោកអាចនឹងទៅជួយក្រុមបាតុករអ៊ីរ៉ង់ ប្រសិនបើកងកម្លាំងសន្តិសុខបាញ់ប្រហារលើពួកគេ។ យ៉ាងណាក៏ដោយ មេដឹកនាំកំពូល លោក Ayatollah Ali Khamenei — ដែលប្រឈមមុខនឹងពេលវេលាដ៏គ្រោះថ្នាក់បំផុតមួយនៃការកាន់អំណាចរយៈពេលជាច្រើនទសវត្សរ៍របស់លោក — បានឆ្លើយតបទៅវិញដោយការប្ដេជ្ញាថា អ៊ីរ៉ង់ «នឹងមិនចុះចាញ់សត្រូវនោះឡើយ»៕