នាយករដ្ឋមន្ត្រីអ៊ីតាលី លោកស្រី Giorgia Meloni បាននិយាយនៅថ្ងៃសុក្រ (ទី៩ ខែមករា ឆ្នាំ២០២៦) នេះថា អឺរ៉ុបគួរតែបើកការសន្ទនាជាមួយរុស្ស៊ីឡើងវិញ ដោយបន្ថែមថា វាគឺលឿនពេកណាស់ ដែលមិនអាចពិភាក្សា អំពីការស្វាគមន៍ទីក្រុងមូស្គូឲ្យត្រឡប់ចូលវិញក្នុងក្រុមប្រទេសមានឧស្សាហកម្មឈានមុខគេទាំង ៨ (G8) ។

លោកស្រី Meloni បាននិយាយថា លោកស្រីយល់ស្របជាមួយប្រធានាធិបតីបារាំង លោក Emmanuel Macron ដែលថ្មីៗនេះ បានអំពាវនាវឲ្យអឺរ៉ុបចូលរួមពាក់ព័ន្ធជាមួយទីក្រុងមូស្គូ ខណៈដែលកិច្ចខិតខំប្រឹងប្រែង បន្តមាន ដើម្បីបញ្ចប់សង្គ្រាម នៅអ៊ុយក្រែន។

នៅក្នុងសន្និសីទសារព័ត៌មានឆ្នាំថ្មីជាប្រពៃណីរបស់លោកស្រី លោកស្រី Meloni បានលើកឡើងថា៖ «ខ្ញុំគិតថា លោក Macron និយាយត្រឹមត្រូវ ពាក់ព័ន្ធនឹងរឿងនេះ។ ខ្ញុំជឿថា ពេលវេលាបានមកដល់ហើយ សម្រាប់អឺរ៉ុប ក្នុងការជជែកជាមួយរុស្ស៊ី»។ លោកស្រីបានបន្ថែមថា៖ «ពីព្រោះប្រសិនបើអឺរ៉ុបសម្រេចចូលរួម ក្នុងដំណាក់កាលនៃការចរចានេះ ដោយសន្ទនាតែជាមួយភាគីម្ខាង ក្នុងចំណោមភាគី២ ខ្ញុំខ្លាចថា នៅទីបញ្ចប់ការចូលរួមចំណែកវិជ្ជមានដែលខ្លួនអាចធ្វើបាន នឹងមានកម្រិត»។

គួរបញ្ជាក់ថា ការចរចា ដើម្បីបញ្ចប់សង្គ្រាមជិត ៤ឆ្នាំ បានបង្កើនល្បឿន ចាប់តាំងពីខែវិច្ឆិកា។ តែទីក្រុងមូស្គូមិនទាន់បានបង្ហាញឆន្ទៈ ក្នុងការធ្វើសម្បទាននៅឡើយទេ បន្ទាប់ពីទីក្រុងគីវ បានជំរុញឲ្យមានការកែប្រែ ចំពោះសំណើរបស់សហរដ្ឋអាមេរិក ដែលដំបូងឡើយគាំទ្រការទាមទារសំខាន់ៗរបស់រុស្ស៊ី។

ទីក្រុងមូស្គូក៏មិនបានផ្តល់សញ្ញាជាសាធារណៈណាមួយថា ខ្លួននឹងទទួលយកកិច្ចព្រមព្រៀងសន្តិភាពជាមួយនឹងផែនការធានាសន្តិសុខដោយសម្ព័ន្ធមិត្តរបស់អ៊ុយក្រែននោះឡើយ ក្នុងនោះរួមទាំងការមានកងទ័ពលោកខាងលិច នៅខាងក្នុងដែនដីអ៊ុយក្រែនផងដែរ។ លោកស្រី Meloni បានសង្កត់ធ្ងន់ថា សហភាពអឺរ៉ុប គួរតែតែងតាំងបេសកជនម្នាក់ ដើម្បីដោះស្រាយដោយផ្ទាល់ជាមួយប្រធានាធិបតីរុស្ស៊ី លោក Vladimir Putin និងជៀសវាងការភ័ន្តច្រឡំ៕