ប្រធានាធិបតីសហរដ្ឋអាមេរិក លោក Donald Trump បានចេញការព្រមានថ្មីដល់មេដឹកនាំប្រទេសអ៊ីរ៉ង់កាលពីថ្ងៃសុក្រ ទី៩ ខែមករា ខណៈវីដេអូបង្ហាញពីការតវ៉ាប្រឆាំងរដ្ឋាភិបាលដែលកំពុងផ្ទុះរាលដាលនៅទូទាំងប្រទេស ហើយអាជ្ញាធរបានកាត់ផ្តាច់អ៊ីនធឺណិតដើម្បីទប់ស្កាត់ភាពវឹកវរដែលកំពុងកើនឡើង។

ក្រុមសិទ្ធិមនុស្សបានកត់ត្រាពីការស្លាប់របស់អ្នកតវ៉ារាប់សិបនាក់ក្នុងរយៈពេលជិតពីរសប្តាហ៍កន្លងទៅនេះ ដោយទូរទស្សន៍រដ្ឋអ៊ីរ៉ង់បង្ហាញពីការប៉ះទង្គិចគ្នា និងការបាញ់កាំភ្លើង ហើយទីភ្នាក់ងារសារព័ត៌មានពាក់កណ្តាលផ្លូវការ Tasnim បានរាយការណ៍ថា មន្ត្រីនគរបាលជាច្រើននាក់ត្រូវបានសម្លាប់។

លោក Trump បានទម្លាក់គ្រាប់បែកទៅលើប្រទេសអ៊ីរ៉ង់កាលពីរដូវក្តៅមុន និងបានព្រមានទីក្រុងតេអេរ៉ង់កាលពីសប្តាហ៍មុនថា សហរដ្ឋអាមេរិកអាចផ្តល់ជំនួយដល់ក្រុមអ្នកតវ៉ាដោយបានចេញការព្រមានមួយផ្សេងទៀតកាលពីថ្ងៃសុក្រថា «អ្នក យកល្អកុំបាញ់សម្លាប់មនុស្សអី ព្រោះថាយើងនឹងចាប់ផ្តើមបាញ់ប្រហារដែរ»។

លោកបាននិយាយបន្ថែមថា «ខ្ញុំសង្ឃឹមថាក្រុមតវ៉ានៅអ៊ីរ៉ង់នឹងមានសុវត្ថិភាព ព្រោះនោះជាកន្លែងដ៏គ្រោះថ្នាក់នៅពេលនេះ»។ 

នៅក្នុងសុន្ទរកថាតាមទូរទស្សន៍ មេដឹកនាំកំពូលអ៊ីរ៉ង់ លោក Ayatollah Ali Khamenei បានសន្យាថានឹងមិនចុះចាញ់ឡើយ ដោយចោទប្រកាន់ក្រុមបាតុករថាធ្វើសកម្មភាពជំនួសឲ្យក្រុមប្រឆាំងនៅបរទេស និងសហរដ្ឋអាមេរិក ហើយរដ្ឋអាជ្ញាបានគំរាមកាត់ទោសប្រហារជីវិត។

ក្រសួងព័ត៌មាន និងបច្ចេកវិទ្យាទំនាក់ទំនងអ៊ីរ៉ង់ បាននិយាយថា ការសម្រេចបិទអ៊ីនធឺណិតត្រូវបានធ្វើឡើង «ដោយអាជ្ញាធរសន្តិសុខមានសមត្ថកិច្ច ក្រោមកាលៈទេសៈបច្ចុប្បន្នរបស់ប្រទេស»។