ប្រជានេសាទចំនួន៤នាក់នៅខេត្តកោះកុង ត្រូវបានសមត្ថកិច្ចថៃដោះលែងឱ្យវិលត្រឡប់មកប្រទេសកម្ពុជាវិញហើយ រសៀលថ្ងៃទី១១ ខែមករា ឆ្នាំ២០២៦ ក្រោមកិច្ចសម្របសម្រួលយ៉ាងសកម្មរបស់អាជ្ញាធរខេត្ត និងសមត្ថកិច្ចពាក់ព័ន្ធ។

ជារឿងដែលគួរឱ្យត្រេកអរ ដែលប្រជានេសាទ៤នាក់ដែលអាជ្ញាធរថៃចាប់ឃាត់ខ្លួននៅលើផ្ទៃសមុទ្រ កាលពីថ្ងៃទី៦ ខែមករា ហើយឥឡូវនេះ ពួកគេត្រូវបានដោះលែងអោយវិលត្រឡប់មកជួបជុំគ្រួសារវិញហើយ គ្រាសាច់ញាតិទន្ទឹងរង់ចាំជិត១សប្តាហ៍មកនេះ។ ការដោះលែងនេសាទរបស់ខេត្តកោះកុង នៅពេលនេះធ្វើឡើងក្រោមកិច្ចសហការយ៉ាងសកម្មរបស់រាជរដ្ឋាភិបាល និងអាជ្ញាធរខេត្តកោះកុង។

លោកជំទាវ ឈី វ៉ា អភិបាលខេត្ត ថ្លែងថា រាល់បញ្ហាប្រជាពលរដ្ឋជាមួយភាគីថៃ មិនត្រូវបានមើល រំលងនោះទេ ពោលគឺបានប្រឹងប្រែងគ្រប់វិធីសាស្រ្តសម្របសម្រួលជាមួយភាគីថៃ ដើម្បីអោយមានការដោះលែងវិញប្រកបដោយសុវត្ថិភាព។

តំណាងប្រជានេសាទត្រូវបានថៃដោះលែង បានឱ្យដឹងថា មុននឹងមានការចាប់ខ្លួន ពួកគាត់នេសាទ ​លើសមុទ្រតាមតែទម្លាប់រកត្រី ក្តាម មឹក ប៉ុណ្ណោះដែលគិតថាជាដែនទឹករបស់កម្ពុជា។ ការចាប់ខ្លួនពួកគាត់ ​សមត្ថកិច្ចបានសួរនាំច្រើនពីការនេសាទ។ ប្រជានេសាទ ក៏សូមថ្លែង​អំណអរគុណយ៉ាងខ្លាំងជូនរាជរដ្ឋាភិបាល និងអាជ្ញាធរខេត្តកោះកុង ដែលបានខិតខំប្រឹងប្រែងដោះស្រាយឱ្យពួកគាត់វិលត្រឡប់មកផ្ទះជួបជុំគ្រួសារវិញ។

គួររម្លឹកថា កងទ័ពជើងទឹកថៃ នៅម៉ោង១១៖៣០នាទីព្រឹក ថ្ងៃទី៦ ខែមករា ឆ្នាំ២០២៦ បានចាប់យកទូកនេសាទប្រជាពលរដ្ឋខ្មែរ១គ្រឿង ដែលមានពលរដ្ឋខ្មែរចំនួន៤នាក់ កំពុងនេសាទ នៅក្បែរនឹងឆ្នេរកោះយ៉ នៅលើផ្ទៃព្រំដែនសមុទ្រកម្ពុជា-ថៃ ដែលមិនទាន់ថមថយកម្ដៅជម្លោះ៕