ក្រសួងការពារជាតិកូរ៉េខាងត្បូង បាននិយាយនៅថ្ងៃចន្ទ (១២ មករា) នេះថា អាជ្ញាធរកូរ៉េខាងត្បូង បានបើកការស៊ើបអង្កេតមួយ ផ្តោតលើលទ្ធភាពដែលថាជនស៊ីវិលអាចជាអ្នកបង្ហោះយានដ្រូនជាច្រើនគ្រឿង ដែលកូរ៉េខាងជើង និយាយថា បានរំលោភលើដែនអាកាសរបស់ខ្លួន។

ប្រធានាធិបតីកូរ៉េខាងត្បូង លោក Lee Jae Myung បានប្ដេជ្ញាថានឹងធ្វើការស៊ើបអង្កេតយ៉ាងឆាប់រហ័ស ហើយកាលពីថ្ងៃសៅរ៍កន្លងទៅ លោកក៏បាននិយាយថា ប្រសិនបើជនស៊ីវិលពិតជាអ្នកបញ្ជាយានដ្រូននោះមែន នោះនឹងក្លាយជា «ឧក្រិដ្ឋកម្មធ្ងន់ធ្ងរ» ដែលគំរាមកំហែងដល់សន្តិសុខ និងសន្តិភាពរបស់កូរ៉េខាងត្បូង នៅលើឧបទ្វីបកូរ៉េ។

អ្នកនាំពាក្យក្រសួងការពារជាតិកូរ៉េខាងត្បូង បានដកស្រង់សម្តីលោករដ្ឋមន្ត្រីការពារជាតិ Ahn Gyu-back ថា កូរ៉េខាងត្បូង មានឆន្ទៈក្នុងការស៊ើបអង្កេតរួមគ្នាជាមួយកូរ៉េខាងជើង ប៉ុន្តែមិនទាន់បានធ្វើសំណើនេះនៅឡើយទេ។

កាលពីថ្ងៃសៅរ៍ចុងសប្ដាហ៍មុន យោធាកូរ៉េខាងជើង បានចោទកូរ៉េខាងត្បូងថា «បង្កហេតុ» ដោយការបញ្ជូនយានដ្រូនទាំងនោះទៅលើដែនអាកាសខ្លួន។ យោធាកូរ៉េខាងត្បូង បានឆ្លើយតបភ្លាមៗ ដោយច្រានចោលថា ខ្លួនពុំមានទំនាក់ទំនងអ្វីជាមួយដ្រូនទាំងនោះទេ ហើយបានបញ្ជាក់ពីជំហររបស់ទីក្រុងសេអ៊ូលថា ខ្លួនមិនមានបំណងញុះញង់កូរ៉េខាងជើងឡើយ៕