ប្រព័ន្ធផ្សព្វផ្សាយរដ្ឋ KCNA បានរាយការណ៍នៅថ្ងៃចន្ទ (១២ មករា) នេះថា កូរ៉េខាងជើង បានរិះគន់ខ្លាំងៗទៅលើក្រុមត្រួតពិនិត្យទណ្ឌកម្មពិសេសមួយ ដែលមានសមាសភាពមកពីប្រទេសជាច្រើន ដោយហៅសកម្មភាពរបស់ក្រុមនោះថា «ខុសច្បាប់» និងមិនពាក់ព័ន្ធនឹងអង្គការសហប្រជាជាតិសោះ។

គួរឱ្យដឹងថា ក្រុមត្រួតពិនិត្យទណ្ឌកម្មពហុភាគី ដែលមានសមាសភាពមកពី ១១ ប្រទេសនោះ រួមទាំងកូរ៉េខាងត្បូង និងសហរដ្ឋអាមេរិក មានគោលបំណងតាមដាន និងរាយការណ៍អំពីការរំលោភបំពាន និងការគេចវេះរបស់ទីក្រុងព្យុងយ៉ាង លើទណ្ឌកម្មដែលដាក់ដោយសេចក្តីសម្រេចក្រុមប្រឹក្សាសន្តិសុខអង្គការសហប្រជាជាតិ។

សេចក្តីថ្លែងការណ៍សារព័ត៌មានមួយរបស់បេសកកម្មអចិន្ត្រៃយ៍កូរ៉េខាងជើង ប្រចាំអង្គការសហប្រជាជាតិ បាននិយាយថា ស្ថាប័ននេះត្រូវបាន «បង្កើតឡើងដោយមិនប្រុងប្រយ័ត្ន» នៅខាងក្រៅប្រព័ន្ធអង្គការសហប្រជាជាតិ ហើយមិនអាចទទួលស្គាល់ដោយសហគមន៍អន្តរជាតិបានឡើយ នេះបើយោងតាមការចុះផ្សាយរបស់ KCNA។

យន្តការនៅក្រោមក្រុមថ្មីនេះ ត្រូវបានដាក់ចេញ បន្ទាប់ពីរុស្ស៊ី ក្នុងឆ្នាំ២០២៤ បានបដិសេធការបន្តជាប្រចាំឆ្នាំ នៃក្រុមអ្នកជំនាញមួយរបស់ UN ដែលបានត្រួតពិនិត្យការអនុវត្តទណ្ឌកម្មអស់ ១៥ឆ្នាំមកហើយ ដែលមានបំណងទប់ស្កាត់កម្មវិធីនុយក្លេអ៊ែរ និងមីស៊ីលរបស់កូរ៉េខាងជើង៕