មន្ត្រីជាន់ខ្ពស់អាមេរិកមួយរូបបាននិយាយថា លោក Scott Bessent រដ្ឋមន្ត្រីក្រសួងរតនាគារសហរដ្ឋអាមេរិក នឹងជំរុញក្រុមប្រទេសទាំងប្រាំពីរ G7 និងប្រទេសដទៃទៀត ឱ្យបង្កើនកិច្ចប្រឹងប្រែងរបស់ពួកគេកាន់តែឆាប់រហ័ស ដើម្បីកាត់បន្ថយការពឹងផ្អែកលើប្រទេសចិន ទាក់ទងនឹងរ៉ែកម្រសំខាន់ៗ នៅពេលលោកធ្វើជាម្ចាស់ផ្ទះទទួលប្រមុខមន្ត្រីហិរញ្ញវត្ថុជាង ១០រូប នៅថ្ងៃចន្ទ (១២ មករា) នេះ។

កិច្ចប្រជុំនេះ ដែលចាប់ផ្តើមជាមួយនឹងអាហារពេលល្ងាចនៅថ្ងៃអាទិត្យ នឹងរួមបញ្ចូលបណ្ដារដ្ឋមន្ត្រីហិរញ្ញវត្ថុ ឬរដ្ឋមន្ត្រីមកពីគណៈរដ្ឋមន្ត្រី នៃប្រទេសសេដ្ឋកិច្ចជឿនលឿន G7 សហភាពអឺរ៉ុប អូស្ត្រាលី ឥណ្ឌា កូរ៉េខាងត្បូង និងម៉ិកស៊ិក នេះបើតាមប្រភពមន្ត្រីជាន់ខ្ពស់រូបនោះ។

គិតជារួម បណ្ដាប្រទេសទាំងនេះគ្របដណ្ដប់អត្រា ៦០% នៃតម្រូវការរ៉ែកម្រទូទាំងពិភពលោក។ ចំណែកចិន គ្របដណ្ដប់យ៉ាងធំលើបណ្ដាញផ្គត់ផ្គង់រ៉ែកម្រ ដោយចម្រាញ់រ៉ែទង់ដែង លីចូម កូបាល់ ក្រាហ្វីត និងរ៉ែផ្សេងទៀត ចន្លោះពី ៤៧% ទៅ ៨៧% នេះបើយោងតាមទីភ្នាក់ងារថាមពលអន្តរជាតិ IEA។

មន្ត្រីរូបនេះបានបន្ថែមថា សហរដ្ឋអាមេរិក ត្រូវបានគេរំពឹងថានឹងចេញសេចក្តីថ្លែងការណ៍មួយបន្ទាប់ពីកិច្ចប្រជុំ ប៉ុន្តែពុំមានសកម្មភាពរួមគ្នាជាក់លាក់ណាមួយទំនងជាកើតឡើងនោះទេ។ កិច្ចប្រជុំនៅថ្ងៃចន្ទនេះ បានកើតឡើងត្រឹមតែប៉ុន្មានថ្ងៃប៉ុណ្ណោះ បន្ទាប់ពីមានរបាយការណ៍ថា ចិន បានចាប់ផ្តើមរឹតបន្តឹងការនាំចេញរ៉ែកម្រទៅក្រុមហ៊ុនជប៉ុន និងមេដែកសំខាន់ៗ ក៏ដូចជាហាមឃាត់ការនាំចេញវត្ថុប្រើប្រាស់ពីរផ្លូវ ទៅកាន់យោធាជប៉ុនផងដែរ៕