បាតុកម្មទូទាំងប្រទេសបានកើតឡើងនៅក្នុងប្រទេសអ៊ីរ៉ង់កាលពីថ្ងៃចន្ទ១២មករាសប្ដាហ៍នេះ ដើម្បីថ្កោលទោសអ្វីដែលពួកគេហៅថា "កុបកម្មគាំទ្រដោយកងកម្លាំងបរទេស" និងប្រឆាំងនឹងសកម្មភាពជ្រៀតជ្រែកជាបន្តបន្ទាប់របស់សហរដ្ឋអាមេរិក និងអ៊ីស្រាអែល។ ក្នុងក្បួនតវ៉ាគាំទ្ររដ្ឋាភិបាលនោះ លោកប្រធានាធិបតីអ៊ីរ៉ង់ ក៏បានចូលរួមផងដែរ។

ប្រជាជនអ៊ីរ៉ង់រាប់ម៉ឺននាក់ដែលគាំទ្ររដ្ឋាភិបាលបានប្រមូលផ្តុំគ្នានៅកណ្តាលទីក្រុងតេអេរ៉ង់ ដោយគ្រវីទង់ជាតិ និងស្រែកពាក្យស្លោកប្រឆាំងនឹងសហរដ្ឋអាមេរិក និងអ៊ីស្រាអែល។ ពួកគេបាននិយាយថា សហរដ្ឋអាមេរិក និងអ៊ីស្រាអែល បានប្រើប្រាស់ភេរវករដើម្បីបង្កើតភាពចលាចលក្នុងប្រទេសអ៊ីរ៉ង់ ក្នុងបំណងធ្វើឱ្យអ៊ីរ៉ង់ចុះខ្សោយ និងបែកបាក់ខណៈកំពុងស្វែងរកផលប្រយោជន៍ផ្ទាល់ខ្លួន។

អ្នកស្រុកអ៊ីរ៉ង់ម្នាក់បាននិយាយ សហរដ្ឋអាមេរិក បានអះអាងថា អ្នកឈរជាមួយប្រជាជន ប៉ុន្តែនៅក្នុងតំបន់ហ្កាហ្សា អ្នកពិតជាបានបង្ហាញពីរបៀបដែលអ្នក 'ឈរជាមួយប្រជាជន' ដូចដែលអ្នកបានធ្វើនៅក្នុងប្រទេសដទៃទៀត។ ឈាមរបស់មនុស្សនៅតែប្រឡាក់ដៃរបស់អ្នក។ ពាក្យសម្ដីរបស់អ្នកគឺដូចជារឿងកំប្លែង។

អ្នកស្រុកអ៊ីរ៉ង់ម្នាក់ទៀតបាននិយាយថា អ្វីដែលហៅថាការចរចា របស់សហរដ្ឋអាមេរិកទាំងអស់គឺជាការក្លែងបន្លំ។ ពួកគេគ្រាន់តែចង់ធ្វើឱ្យអ៊ីរ៉ង់មិនមានសុវត្ថិភាព និងបែកបាក់ ដូចអ្វីដែលពួកគេបានធ្វើនៅក្នុងប្រទេសស៊ីរី និងអ៊ីរ៉ាក់ ហើយស្វែងរកផលប្រយោជន៍ផ្ទាល់ខ្លួន។

ប្រជាជនអ៊ីរ៉ង់ដែលចូលរួមក្នុងបាតុកម្មនិយាយថា ពួកគេនឹងរួបរួមគ្នាជាកម្លាំងមួយក្នុងការទប់ទល់នឹងការឃុបឃិត និងទម្រង់នៃការឈ្លានពានណាមួយដោយសហរដ្ឋអាមេរិក និងអ៊ីស្រាអែល។

មេដឹកនាំកំពូលអ៊ីរ៉ង់លោក Ali Khamenei បានហៅការជួបជុំនេះថាជាការព្រមានយ៉ាងម៉ឺងម៉ាត់ដល់អ្នកនយោបាយអាមេរិកឱ្យបញ្ឈប់សកម្មភាពបោកប្រាស់របស់ពួកគេ ហើយឈប់ពឹងផ្អែកលើបុគ្គលក្បត់ជាតិ៕