ក្រុមជំនួយមនុស្សធម៌របស់អង្គការសហប្រជាជាតិ បាននិយាយកាលពីថ្ងៃចន្ទថា អសន្តិសុខកាន់តែកើនឡើងនៅទូទាំងតំបន់ Kordofanនៃប្រទេសស៊ូដង់ កំពុងបង្កឲ្យមានរលកថ្មីនៃការផ្លាស់ទីលំនៅ និងធ្វើឲ្យហេដ្ឋារចនាសម្ព័ន្ធស៊ីវិលចុះខ្សោយ រួមទាំងសេវាសុខភាពផងដែរ។ 

ការិយាល័យសម្របសម្រួលកិច្ចការមនុស្សធម៌របស់អង្គការសហប្រជាជាតិ (OCHA) បាននិយាយថា ជនស៊ីវិល កំពុងជួបផលវិបាកដ៏ធ្ងន់ធ្ងរ។

ការិយាល័យនេះ បានឲ្យដឹងទៀតថា៖«នៅក្នុងទីក្រុង Dilling ក្នុងរដ្ឋ South Kordofan បណ្តាញគ្រូពេទ្យស៊ូដង់ បានរាយការណ៍កាលថ្ងៃចន្ទថា មន្ទីរពេទ្យធំៗចំនួនបីឥឡូវនេះលែងដំណើរការហើយ ដោយសារការបាញ់ផ្លោងជាបន្តបន្ទាប់ ហើយគ្រូពេទ្យចំនួន ៤នាក់ ត្រូវបានរាយការណ៍ថា ត្រូវបានសម្លាប់»។ «អសន្តិសុខជាបន្តបន្ទាប់ និងស្ថានភាពដូចជាការឡោមព័ទ្ធ បានរឹតត្បិតយ៉ាងខ្លាំងចំពោះការទទួលបានជំនួយសង្គ្រោះជីវិតសម្រាប់ជនស៊ីវិលដែលជាប់នៅក្នុងទីក្រុងនេះ»។

OCHA បាននិយាយថា សមាគមវេជ្ជសាស្ត្រ បានរាយការណ៍កាលពីថ្ងៃចន្ទថា មនុស្ស ៥នាក់ ត្រូវបានសម្លាប់ និង ១៣នាក់ ផ្សេងទៀតរងរបួស ដែលសុទ្ធតែជាជនស៊ីវិល នៅក្នុងការវាយប្រហារមួយលើផ្សារ Kartala ក្នុងតំបន់ភ្នំ ៦ នៃ រដ្ឋ South Kordofan កាលពីថ្ងៃអាទិត្យ។

អង្គការទេសន្តរប្រវេសន៍អន្តរជាតិ (IOM) បានរាយការណ៍ថា មនុស្សជាង ២.២០០នាក់ ត្រូវបានផ្លាស់ទីលំនៅ កាលពីសប្តាហ៍មុនពីតំបន់ Abassiya និងរដ្ឋធានី Kadugli នៃរដ្ឋ South Kordofan ហើយកំពុងធ្វើដំណើរឆ្ពោះទៅរដ្ឋ White Nile។ ដៃគូក្នុងស្រុកបានបង្ហាញថា គ្រួសារដែលត្រូវបានផ្លាស់ទីលំនៅពីរដ្ឋ North Kordofan នៅតែបន្តមកដល់រដ្ឋ Gedaref, Khartoum និងរដ្ឋ River Nile៕