ប្រភពមួយនៅក្នុងក្រសួងការបរទេសទួរគី បានប្រាប់សារព័ត៌មាន TASS ថា មន្ត្រីមកពីសហរដ្ឋអាមេរិក អេហ្ស៊ីប កាតា និងទួរគី បានរៀបចំកិច្ចប្រជុំតាមអ៊ីនធឺណិត ដើម្បីពិភាក្សាអំពីការរៀបចំសម្រាប់ការអនុវត្តដំណាក់កាលទី ២ នៃផែនការសន្តិភាពសម្រាប់តំបន់ហ្កាហ្សា ដោយបន្ថែមថា ទីក្រុងអង់ការ៉ា ត្រូវបានតំណាងដោយរដ្ឋមន្ត្រីការបរទេស Hakan Fidan។

ប្រភពដដែលបាននិយាយថា៖«កាលពីថ្ងៃចន្ទ (ទី១២ ខែមករា) រដ្ឋមន្ត្រីការបរទេស Fidan បានចូលរួមក្នុងកិច្ចប្រជុំតាមអ៊ីនធឺណិត ដែលផ្តោតលើបញ្ហានៃការរៀបចំសម្រាប់ដំណាក់កាលទី ២ នៃផែនការសន្តិភាពហ្កា ហ្សា។ កិច្ចប្រជុំនេះ ត្រូវបានធ្វើឡើងជាការតាមដាននៃកិច្ចប្រជុំនៅទីក្រុងម៉ៃអាមីនៃរដ្ឋហ្វ្លរីដា នៅចុងខែធ្នូ។ ជំនួបនោះដែរ ក៏មានការចូលរួមពីមន្ត្រីសហរដ្ឋអាមេរិក អេហ្ស៊ីប និងកាតាផងដែរ»។ 

យោងតាមរបាយការណ៍ថ្មីៗនេះបានឲ្យដឹងថា អ៊ីស្រាអែល និងក្រុមហាម៉ាស ត្រូវបានគេរំពឹងថា នឹងប្រកាសពីការចាប់ផ្តើមនៃការអនុវត្តដំណាក់កាលទី២ នៃកិច្ចព្រមព្រៀងឈប់បាញ់ហ្កាហ្សា នៅក្នុងខែមករា។

អ៊ីស្រាអែល និងក្រុមហាម៉ាស បានបន្តកិច្ចចរចាដោយប្រយោលដែលសម្របសម្រួលដោយអេហ្ស៊ីប កាតា សហរដ្ឋអាមេរិក និងទួរគី ស្តីពីការដោះស្រាយស្ថានការណ៍ នៅតំបន់ហ្កាហ្សាស្ទ្រីប នៅថ្ងៃទី ០៦ ខែតុលា។ នៅថ្ងៃទី ០៩ ខែតុលា ភាគីជម្លោះបានចុះហត្ថលេខាលើកិច្ចព្រមព្រៀងមួយស្តីពីការអនុវត្តដំណាក់កាលទី១ នៃផែនការឈប់បាញ់នៅតំបន់ហ្កាហ្សារបស់ប្រធានាធិបតីអាមេរិក ដូណាល់ ត្រាំ។ បទឈប់បាញ់បានចូលជាធរមាន នៅថ្ងៃទី ១០ ខែតុលា។ ក្រោមកិច្ចព្រមព្រៀងនេះ កងទ័ពអ៊ីស្រាអែលបានដកថយទៅកាន់អ្វីដែលហៅថា ខ្សែបន្ទាត់លឿង ប៉ុន្តែនៅតែគ្រប់គ្រងលើទឹកដីជាង ៥០%នៃតំបន់ហ្កាហ្សា៕