ប្រជាកសិករបារាំង បានបើកត្រាក់ទ័ររាប់រយគ្រឿងចូលទៅក្នុងទីក្រុងប៉ារីស នៅថ្ងៃអង្គារ (១៣ មករា) នេះ ជាលើកទីពីរក្នុងរយៈពេលត្រឹមតែ ១សប្តាហ៍ ដើម្បីតវ៉ាប្រឆាំងនឹងកិច្ចព្រមព្រៀងពាណិជ្ជកម្មរវាងសហភាពអឺរ៉ុប និងបណ្ដាប្រទេសអាមេរិកខាងត្បូង ឈ្មោះថា កិច្ចព្រមព្រៀងទីផ្សាររួមអាមេរិកឡាទីន Mercosur ដែលពួកគេនិយាយថា គំរាមកំហែងដល់កសិកម្មក្នុងស្រុក ដោយបង្កើតឱ្យមានការប្រកួតប្រជែងដ៏អយុត្តិធម៌ជាមួយនឹងការនាំចូលតម្លៃថោកពីអាមេរិកខាងត្បូង។

កសិករនៅបារាំង ដែលជាប្រទេសផលិតកសិកម្មធំជាងគេក្នុងសហភាពអឺរ៉ុប ព្រមទាំងរដ្ឋជាសមាជិកប្លុកអឺរ៉ុបដទៃទៀត បានចេញតវ៉ាអស់រយៈពេលជាច្រើនខែមកហើយ ជុំវិញកិច្ចព្រមព្រៀងទីផ្សាររួមនេះ និងការត្អូញត្អែរក្នុងស្រុកជាច្រើន។

បាតុកម្មនៅទីក្រុងប៉ារីស នាថ្ងៃអង្គារនេះ ត្រូវបានរៀបចំឡើងដោយសហជីពកសិករធំជាងគេមួយរបស់បារាំង ឈ្មោះ FNSEA។ នគរបាលទីក្រុងប៉ារីស បានចេញការប៉ាន់ប្រមាណរបស់ខ្លួនថា មានត្រាក់ទ័រប្រហែល ៣៥០ គ្រឿង បានចូលរួមនៅក្នុងបាតុកម្ម។ ក្បួនត្រាក់ទ័រដ៏វែងមួយ បានជួបជុំគ្នានៅកណ្ដាលក្រុង ខណៈក្បួនមួយទៀតក៏បានទៅដល់អគារសភាបារាំងផងដែរ។

កិច្ចព្រមព្រៀង Mercosur ត្រូវបានអនុម័តរួចទៅហើយ ដោយរដ្ឋភាគច្រើននៃប្លុកអឺរ៉ុប កាលពីថ្ងៃសុក្រសប្ដាហ៍មុន បើទោះបីជាមានការជំទាស់ពីបារាំងក៏ដោយ ហើយកសិករ និងគណបក្សប្រឆាំង បានបង្កើនសម្ពាធលើរដ្ឋាភិបាល ដែលគណបក្សខ្លះបានដាក់ញត្តិដកសេចក្ដីទុកចិត្តទៅកាន់សភា៕