នៅថ្ងៃអង្គារនេះ ប្រធានាធិបតីកូរ៉េខាងត្បូងលោក Lee Jae Myung និងនាយករដ្ឋមន្រ្តីជប៉ុនលោកស្រី Sanae Takaichi បានបញ្ជាក់ឡើងវិញពីទំនាក់ទំនងរវាងប្រទេសទាំង ២ ស្របពេលប្រទេសជិតខាងអាស៊ីខាងកើតទាំង ២នេះ ចង់ពង្រឹងកិច្ចសហប្រតិបត្តិការសន្តិសុខ និងសេដ្ឋកិច្ច ខណៈកើតមានអ្វីដែលលោក Lee ចាត់ទុកថាជា “សណ្តាប់ធ្នាប់អន្តរជាតិដ៏ច្របូកច្របល់ និងស្មុគស្មាញ” ។

មេដឹកនាំទាំង ២ ត្រូវបានគេរំពឹងថា នឹងពិភាក្សាលើការរំសាយអាវុធនុយក្លេអ៊ែរនៅឧបទ្វីបកូរ៉េ ជោគវាសនារបស់ជនជាតិជប៉ុនដែលត្រូវបានចាប់ពង្រាត់ដោយកូរ៉េខាងជើង និងកិច្ចសហប្រតិបត្តិការក្នុងតំបន់ រួមទាំងបញ្ញាសិប្បនិម្មិត(AI) និងវត្ថុពាក់កណ្តាលចម្លង ។

ជំនួបនៅខេត្ត Nara ដែលជាខេត្តកំណើតរបស់លោកស្រី Takaichi បានកើតមានរយៈពេល ១សប្តាហ៍ប៉ុណ្ណោះ ក្រោយលោក Leeជួបជាមួយប្រធានាធិបតីចិនលោក Xi Jinping ។

ទីក្រុងតូក្យូ និងទីក្រុងប៉េកាំង ជាប់ផុងក្នុងជម្លោះការទូត បន្ទាប់ពីសេចក្តីអត្ថាធិប្បាយរបស់លោកស្រី Takaichi ថា ជប៉ុនអាចនឹងដាក់ពង្រាយកងកម្លាំងរបស់ខ្លួន បើសិនជាចិនវាយប្រហារកោះតៃវ៉ាន់បង្កការគំរាមដល់អត្ថិរភាព ។

លោក Leeដែលនឹងចំណាយពេល ២ថ្ងៃនៅប្រទេសជប៉ុន និយាយមុននេះថា ស្របពេលដែលភាពជាប់គាំងផ្នែកការទូតមិនមែនជាអ្វីដែលពួកយើងចង់បានសម្រាប់សន្តិភាពក្នុងតំបន់នោះទេ លោកមិនជ្រៀតជ្រែកក្នុងជម្លោះនោះទេ ។

លោកស្រី Takaichi និងលោក Lee នឹងផ្តល់សេចក្តីថ្លែងការណ៍រួម ក្រោយជំនួបរបស់ពួកគេ ៕