ប្រភពចំនួនពីរបានប្រាប់សារព័ត៌មានរ៉យទ័រថា ក្រុមហាម៉ាសត្រូវបានគេរំពឹងថានឹងជ្រើសរើសមេដឹកនាំថ្មីនៅខែនេះ ដោយបំពេញតួនាទីនៅទំនេរចាប់តាំងពីអ៊ីស្រាអែលបានសម្លាប់លោក Yahya Sinwar ក្នុងឆ្នាំ២០២៤ ទោះបីជាមានការព្រួយបារម្ភថាអ្នកកាន់តំណែងអាចរងជោគវាសនាដូចគ្នាក៏ដោយ។

លោក Khalil Al-Hayya និងលោក Khaled Meshaal ត្រូវបានគេមើលឃើញថាជាអ្នកនាំមុខសម្រាប់តំណែងនេះនៅពេលវេលាដ៏សំខាន់មួយសម្រាប់ក្រុមសកម្មប្រយុទ្ធអ៊ីស្លាមដែលញាំញីដោយសង្គ្រាមរយៈពេលពីរឆ្នាំមកនេះបង្កឡើងដោយការវាយប្រហារកាលពីថ្ងៃទី៧ ខែតុលា ឆ្នាំ២០២៣ លើអ៊ីស្រាអែល និងប្រឈមការទាមទារពីអន្តរជាតិឱ្យរំសាយអាវុធ។

បុរសទាំងពីរនាក់នេះរស់នៅក្នុងប្រទេសកាតា និងជាសមាជិកក្រុមប្រឹក្សាមានសមាជិកប្រាំនាក់ ដែលបានដឹកនាំក្រុមហាម៉ាសចាប់តាំងពីអ៊ីស្រាអែលបានសម្លាប់លោក Sinwar ជាមេគំនិតក្នុងការវាយប្រហារនៅថ្ងៃទី៧ ខែតុលា។ អ្នកកាន់តំណែងមុនរបស់លោក គឺលោក Ismail Haniyeh ត្រូវបានធ្វើឃាតដោយអ៊ីស្រាអែល ខណៈកំពុងធ្វើទស្សនកិច្ចនៅប្រទេសអ៊ីរ៉ង់កាលពីក្នុងឆ្នាំ២០២៤។

ប្រភពទាំងនោះបាននិយាយថា ដំណើរការបោះឆ្នោតបានចាប់ផ្តើមរួចហើយ។ មេដឹកនាំត្រូវបានជ្រើសរើសនៅក្នុងការបោះឆ្នោតសម្ងាត់ដោយក្រុមប្រឹក្សា Shoura របស់ក្រុមហាម៉ាស ជាស្ថាប័នមួយដែលមានសមាជិក ៥០នាក់ រួមមានសមាជិកក្រុមហាម៉ាសនៅក្នុងតំបន់West Bank កាន់កាប់ដោយអ៊ីស្រាអែល តំបន់ហ្កាហ្សា និងនិរទេសជន។