ប្រមុខអង្គការសុខភាពពិភពលោក(WHO) បានព្រមានកាលពីថ្ងៃអង្គារ ទី១៣ ខែមករា ថា ការសម្រេចចិត្តរបស់ទីក្រុងវ៉ាស៊ីនតោនក្នុងការដកខ្លួនចេញពីទីភ្នាក់ងារសុខភាពរបស់អង្គការសហប្រជាជាតិ គឺមានគ្រោះថ្នាក់សម្រាប់សហរដ្ឋអាមេរិក និងពិភពលោកទាំងមូល។ ប្រធានាធិបតីសហរដ្ឋអាមេរិក លោក Donald Trump បានចុះហត្ថលេខាលើក្រឹត្យមួយ ត្រឹមតែប៉ុន្មានម៉ោងបន្ទាប់ពីវិលត្រឡប់ចូលទៅសេតវិមានវិញកាលពីថ្ងៃទី២០ ខែមករា ឆ្នាំ២០២៥ ដោយបញ្ជាឱ្យប្រទេសរបស់លោកដកខ្លួនចេញពីអង្គការសុខភាពពិភពលោក (WHO)។

ជាមួយនឹងដំណើរការដកខ្លួនរយៈពេលមួយឆ្នាំ ដែលកំណត់ឈានដល់ការបញ្ចប់នៅសប្តាហ៍ក្រោយ ប្រមុខអង្គការសុខភាពពិភពលោក លោក Tedros Adhanom Ghebreyesus បានប្រាប់អ្នកសារព័ត៌មានថា លោកសោកស្តាយយ៉ាងខ្លាំងចំពោះចំណាត់ការនេះ។ លោកបានថ្លែងពីទីស្នាក់ការកណ្តាលរបស់ទីភ្នាក់ងារនៅទីក្រុងហ្សឺណែវថា «ការដកខ្លួនចេញពីអង្គការសុខភាពពិភពលោក គឺជាការខាតបង់សម្រាប់សហរដ្ឋអាមេរិក ហើយវាក៏ជាការខាតបង់សម្រាប់ពិភពលោកទាំងមូលផងដែរ»។

លោកបានព្រមានថា ការដកខ្លួនចេញនេះ «ធ្វើឱ្យសហរដ្ឋអាមេរិកពុំមានសុវត្ថិភាព ហើយក៏ធ្វើឱ្យពិភពលោកទាំងមូលពុំមានសុវត្ថិភាពដូចគ្នា ដូច្នេះវាពុំមែនជាការសម្រេចចិត្តត្រឹមត្រូវនោះទេ»។ លោក Tedros បានបញ្ជាក់ថា «មានរឿងរ៉ាវជាច្រើនដែលត្រូវបានធ្វើឡើងតាមរយៈអង្គការសុខភាពពិភពលោក ដែលផ្តល់ប្រយោជន៍ដល់សហរដ្ឋអាមេរិក ជាពិសេសបញ្ហាសន្តិសុខសុខភាព»។

លោកនិយាយថា «នោះហើយជាមូលហេតុដែលខ្ញុំនិយាយថា សហរដ្ឋអាមេរិក មិនអាចមានសុវត្ថិភាពបានទេ បើមិនធ្វើការជាមួយអង្គការសុខភាពពិភពលោក(WHO)» ។ «ខ្ញុំសង្ឃឹមថា សហរដ្ឋអាមេរិកនឹងពិចារណាឡើងវិញនូវការសម្រេចចិត្តរបស់ខ្លួន ហើយចូលរួមជាថ្មី»។