កងកម្លាំងភ្នាក់ងារសហព័ន្ធបានប៉ះទង្គិចជាមួយក្រុមបាតុករនៅទីក្រុង St. Paul និង Minneapolis រដ្ឋ Minnesota សហរដ្ឋអាមេរិក កាលពីថ្ងៃអង្គារ១៤មករា សប្ដាហ៍នេះ ជិតមួយសប្តាហ៍បន្ទាប់ពីការបាញ់សម្លាប់ស្រ្តីមានកូន៣នាក់ ឈ្មោះ Renee Good ដោយមន្ត្រីសហព័ន្ធ ខណៈបាតុកម្មនៅតែបន្តនៅខាងក្រៅអគារសហព័ន្ធ និងនៅក្នុងសហគមន៍នានា។

នៅឯអគារ Whipple Federal ក្នុងទីក្រុង St. Paul ភ្នាក់ងារសហព័ន្ធបានដាក់ពង្រាយគ្រាប់បែកផ្សែង ខណៈក្រុមបាតុករបានស្រែក និងប្រឈមជាមួយក្រុមមន្ត្រី។ក្រុមអាជ្ញាធរបានចាប់ខ្លួនស្ត្រីយ៉ាងហោចណាស់ម្នាក់ក្នុងអំឡុងពេលប្រឈមដាក់គ្នានោះ។

ការប៉ះទង្គិចគ្នាក៏បានកើតឡើងផងដែរនៅទីក្រុង Minneapolis ជាកន្លែងដែលភ្នាក់ងារសហព័ន្ធបានបាញ់ឧស្ម័នបង្ហូរទឹកភ្នែក និងម្សៅម្រេចលើក្រុមបាតុករ។

ក្នុងចំណោមក្រុមបាតុករមានអតីតគ្រូបង្វឹកបាល់ទាត់លោក Kelly Gregg ដែលជាជនជាតិដើម Minneapolis និងជាអតីតយុទ្ធជន ដែលបាននិយាយថារូបលោកមានអារម្មណ៍ថាត្រូវបង្ខំចិត្តតវ៉ាទោះបីជាជិតចូលនិវត្តន៍ក៏ដោយ។ លោកGregg បាននិយាយថា លោកមិនចង់នៅទីនេះទេ ប៉ុន្តែប្រសិនបើលោកមិនបង្ហាញខ្លួនទេ នោះកាន់តែអាក្រក់ទៅទៀត។វាជារឿងមិនសមហេតុផលដែលមិនក្រោកឈរឡើង ហើយនិយាយថារឿងនេះខុស។ នេះគឺជាផ្នែកមួយនៃលទ្ធិប្រជាធិបតេយ្យ។

មន្ត្រីសហព័ន្ធប្រមាណ ២ពាន់នាក់ ត្រូវបានបញ្ជូនទៅតំបន់ Minneapolis-St. Paul រួចទៅហើយ ដែលក្រសួងសន្តិសុខមាតុភូមិរបស់អាមេរិក(DHS)ហៅថាជាប្រតិបត្តិការដ៏ធំបំផុតរបស់ខ្លួនមិនធ្លាប់មាន៕