មន្ត្រីជាន់ខ្ពស់មួយរូបរបស់ក្រុមហេសបូឡា (Hezbollah) បានព្រមានថា កិច្ចខិតខំប្រឹងប្រែងរបស់រដ្ឋាភិបាលលីបង់ក្នុងការរំសាយអាវុធរបស់ក្រុមនេះទូទាំងប្រទេសអាចធ្វើឱ្យប្រទេសធ្លាក់ចូលក្នុងភាពវឹកវរ និងសង្គ្រាមស៊ីវិល នេះបើយោងតាមការលើកឡើងដែលបានផ្សព្វផ្សាយដោយក្រុមភេរវករគាំទ្រដោយអ៊ីរ៉ង់កាលពីថ្ងៃពុធ១៤មករាសប្ដាហ៍នេះ។

លីបង់បានសន្យាថានឹងដាក់អាវុធទាំងអស់ឱ្យស្ថិតនៅក្រោមការគ្រប់គ្រងរបស់រដ្ឋស្របតាមកិច្ចព្រមព្រៀងឆ្នាំ២០២៤ ដែលបានបញ្ចប់សង្គ្រាមដ៏បំផ្លិចបំផ្លាញរវាងក្រុមហេសបូឡា និងអ៊ីស្រាអែល។ ទោះជាយ៉ាងណាក៏ដោយ ក្រុមហេសបូឡា ទទូចថាកិច្ចព្រមព្រៀងនេះអនុវត្តចំពោះតែភាគខាងត្បូងលីបង់នៅជិតព្រំដែនអ៊ីស្រាអែលប៉ុណ្ណោះ ហើយបានបដិសេធចំណាត់ការណាមួយដើម្បីប្រគល់អាវុធរបស់ខ្លួននៅកន្លែងផ្សេង។

នៅក្នុងបទសម្ភាសន៍ជាមួយទូរទស្សន៍រដ្ឋរុស្ស៊ី RT មន្ត្រីនយោបាយជាន់ខ្ពស់របស់ក្រុមហេសបូឡាលោក Mahmoud Qmati បាននិយាយថា ការពង្រីកវិសាលភាពនៃការរំសាយអាវុធហួសពីភាគខាងត្បូងនឹងជាឧក្រិដ្ឋកម្មដ៏ធំបំផុតដែលប្រព្រឹត្តដោយរដ្ឋ។

លោក Qmati បាននិយាយថា ផ្លូវដែលរដ្ឋាភិបាលលីបង់ និងស្ថាប័នរដ្ឋបានដើរ នឹងរុញឱ្យលីបង់ធ្លាក់ចូលទៅក្នុងអស្ថិរភាព ភាពវឹកវរ និងប្រហែលជាសង្គ្រាមស៊ីវិលទៀតផង។ លោកបានបន្ថែមថា ក្រុមហេសបូឡានឹងមិនអនុញ្ញាតឱ្យខ្លួនត្រូវបានទាញចូលទៅក្នុងការប្រឈមដាក់គ្នាជាមួយកងទ័ពលីបង់ឡើយ៕