យោងតាមការចុះផ្សាយរបស់សារព័ត៌មាន NewsNation របស់សហរដ្ឋអាមេរិក បានឱ្យដឹងថា មន្ទីរបញ្ចកោណកំពុងផ្លាស់ទីក្រុមប្រយុទ្ធនៃនាវាផ្ទុកយន្តហោះមួយគ្រឿង ពីសមុទ្រចិនខាងត្បូង ទៅកាន់តំបន់ទទួលខុសត្រូវរបស់បញ្ជាការកណ្តាលសហរដ្ឋអាមេរិក ដែលរួមមានមជ្ឈិមបូព៌ា ខណៈភាពតានតឹងកើនឡើងខ្លាំងរវាងរដ្ឋបាលលោកប្រធានាធិបតីអាមេរិក Donald Trump និងអ៊ីរ៉ង់។

គួរឱ្យដឹងថា ក្រុមប្រយុទ្ធនៃនាវាផ្ទុកយន្តហោះ គឺជាកងនាវាចរដែលនៅជុំវិញនាវាផ្ទុកយន្តហោះមួយគ្រឿង ជាមួយនឹងនាវាជាច្រើនប្រភេទផ្សេងទៀតនៅក្នុងនោះ រួមទាំងនាវាមុជទឹកវាយប្រហារយ៉ាងហោចណាស់មួយគ្រឿងផងដែរ។ ប្រភពបាននិយាយថា ការផ្លាស់ទីបែបនេះត្រូវបានគេរំពឹងថា នឹងចំណាយពេលប្រហែល ១សប្តាហ៍។ នាវាផ្ទុកយន្តហោះ ឈ្មោះ USS Abraham Lincoln គឺជានាវាដែលត្រូវបានគេរាយការណ៍ថា កំពុងធ្វើដំណើរឆ្ពោះទៅតំបន់នោះ។

ការផ្ទេរយុទ្ធោបករណ៍យោធាអាមេរិកដ៏សំខាន់បែបនេះ កើតឡើងស្របពេលមានស្ថានការណ៍ចលាចលទាក់ទងនឹងបាតុកម្មនៅអ៊ីរ៉ង់ និងស្របពេលសំណួរជាច្រើនអំពីថា តើសេតវិមាននឹងផ្តល់ការគាំទ្រដល់ក្រុមបាតុករឬទេ ខណៈអ្នកតវ៉ាទាំងនោះបានទាមទារឱ្យបញ្ចប់របបអ៊ីរ៉ង់។

លោក Trump បាននិយាយកាលពីថ្ងៃពុធ (១៤ មករា) ថា លោកទទួលដំណឹងថា ការកាប់សម្លាប់នៅអ៊ីរ៉ង់ បានថយចុះហើយ នៅក្នុងសុន្ទរកថាដែលត្រូវគេមើលឃើញយ៉ាងទូលំទូលាយថាជាការបន្ធូរភាពតានតឹង បើទោះបីជាលោកមិនបានច្រានចោលលទ្ធភាពនៃអន្តរាគមន៍យោធាក៏ដោយ។ យ៉ាងណាមិញ របាយការណ៍អំពីការដាក់ពង្រាយយោធាក្នុងតំបន់ របាយការណ៍ជម្លៀស និងការលើកឡើងរបស់ក្រុមមន្ត្រីលោកខាងលិច បានចង្អុលបង្ហាញពី ការវាយប្រហារដែល «ជិតមកដល់»៕