អាជ្ញាធរបាននិយាយថា មន្ត្រីសហព័ន្ធ បានបាញ់ជនជាតិវេណេស៊ុយអេឡាម្នាក់ ត្រូវចំជើង បន្ទាប់ពីមន្រ្តីត្រូវបានវាយប្រហារដោយប៉ែល និងដងអំបោស កាលពីថ្ងៃពុធ (១៤ មករា) ខណៈភ្នាក់ងារអន្តោប្រវេសន៍សហរដ្ឋអាមេរិក កំពុងដេញតាមជនអន្តោប្រវេសន៍រូបនោះ អំឡុងប្រតិបត្តិការចរាចរណ៍ "កំណត់គោលដៅ" មួយនៅទីក្រុង Minneapolis។ 

ឧប្បត្តិហេតុនេះបានបង្កើនភាពភ័យខ្លាច និងកំហឹង កាន់តែខ្លាំងក្លាឡើង ដែលកំពុងតែរីកសាយភាយពាសពេញទីក្រុងនេះអស់រយៈពេល ១សប្តាហ៍មកហើយ បន្ទាប់ពីភ្នាក់ងារអន្តោប្រវេសន៍ បានបាញ់ស្ត្រីម្នាក់បណ្ដាលឱ្យស្លាប់។

កាលពីយប់ថ្ងៃពុធ ការប៉ះទង្គិចបានផ្ទុះឡើង និងផ្សែងបានហុយពាសពេញដងផ្លូវ នៅជិតកន្លែងបាញ់ប្រហារចុងក្រោយបំផុត ខណៈក្រុមមន្ត្រីសហព័ន្ធ ដែលពាក់ម៉ាស់ការពារឧស្ម័ន និងមួកសុវត្ថិភាព បានបាញ់ឧស្ម័នបង្ហូរទឹកភ្នែកដាក់ហ្វូងមនុស្សមួយក្រុមតូច ហើយក្រុមបាតុករបានគប់ដុំថ្ម និងបាញ់កាំជ្រួចដាក់នគរបាល។

ការបាញ់ប្រហារថ្ងៃពុធនោះ បានកើតឡើងត្រឹមតែមួយសប្តាហ៍ប៉ុណ្ណោះ បន្ទាប់ពីភ្នាក់ងារអនុវត្តច្បាប់អន្តោប្រវេសន៍ និងគយ ICE របស់សហរដ្ឋអាមេរិក បានបាញ់សម្លាប់ស្ត្រីវ័យ ៣៧ឆ្នាំម្នាក់ ឈ្មោះ Renee Good ស្របពេលវិធានការអន្តោប្រវេសន៍កាន់តែតឹងរ៉ឹង ដែលបង្កឱ្យមានរលកនៃការតវ៉ាជាបន្តបន្ទាប់៕