ប្រជាជនកោះ Greenland ក្នុងពេលជាមួយគ្នា បានបង្ហាញទាំងការថប់បារម្ភ និងការធូរស្រាលចិត្ត បន្ទាប់ពីមានកិច្ចប្រជុំមួយ កាលពីថ្ងៃពុធ (ទី១៤ ខែមករា ឆ្នាំ២០២៦) នៅសេតវិមាន រវាងមន្ត្រី មកពីសហរដ្ឋអាមេរិក ប្រទេសដាណឺម៉ាក និងដែនដីនេះ ដែលកា្លយជាចំណុចផ្ដោតសំខាន់របស់លោកប្រធានាធិបតី Donald Trump។

រដ្ឋមន្ត្រីការបរទេសដាណឺម៉ាក និងកោះ Greenland ដែលជាទឹកដីស្វយ័តក្រោមអធិបតេយ្យភាពរបស់ទីក្រុង Copenhagen (កូប៉ិនហាក) បានជួបប្រជុំគ្នា កាលពីថ្ងៃពុធ ជាមួយអនុប្រធានាធិបតី លោក JD Vance និងរដ្ឋមន្ត្រីការបរទេស លោក Marco Rubio ដែលជាការប៉ុនប៉ង ដើម្បីធ្វើឲ្យជ្រះស្រឡះនូវ «ការយល់ច្រឡំ» បន្ទាប់ពីលោក Trump បាននិយាយម្តងហើយម្តងទៀត អំពីលទ្ធភាពនៃការដណ្ដើមកាន់កាប់កោះនេះ។

លោកស្រី Vera Stidsen វ័យ ៥១ឆ្នាំ ដែលជាគ្រូបង្រៀននៅរដ្ឋធានី Nuuk របស់កោះ Greenland បាននិយាយថា៖ «វាគួរឲ្យខ្លាចណាស់ ព្រោះវាជារឿងធំមួយ។ ខ្ញុំសង្ឃឹមថា នាពេលអនាគត យើងអាចបន្តរស់នៅ ដូចដែលយើងមានរហូតមកដល់ពេលនេះ ដោយសន្តិភាព និងគ្មានការរំខានអ្វីឡើយ»។

គួរបញ្ជាក់ថា បន្ទាប់ពីកិច្ចប្រជុំនោះ រដ្ឋមន្ត្រីការបរទេសដាណឺម៉ាក លោក Lars Lokke Rasmussen បានសម្តែង «ការមិនយល់ស្របជាមូលដ្ឋាន» ជាមួយទីក្រុងវ៉ាស៊ីនតោន ជុំវិញជោគវាសនានៃទឹកដីអាក់ទិក ខណៈពេលដែលលោក Trump បាននិយាយថា លោកគិតថា «ដំណោះស្រាយមួយនឹងត្រូវបានរកឃើញ»៕