សេតវិមាននិយាយថា ជម្រើសទាំងអស់នៅតែមាននៅលើតុ សម្រាប់សហរដ្ឋអាមេរិកក្នុងការចាត់វិធានការយោធាប្រឆាំងនឹងអ៊ីរ៉ង់ ដោយបញ្ជាក់ជាថ្មីថា ទីក្រុងតេអេរ៉ង់ នឹងប្រឈមផលវិបាកធ្ងន់ធ្ងរប្រសិនបើការសម្លាប់បាតុករប្រឆាំងរដ្ឋាភិបាលនៅតែបន្ត។ក្នុងអំឡុងពេលសន្និសីទសារព័ត៌មានមួយកាលពីថ្ងៃព្រហស្បតិ៍១៥មករាសប្ដាហ៍នេះ អ្នកនាំពាក្យ សេតវិមាន លោកស្រី ការ៉ូឡាញឡេវីត ( Karoline Leavitt) បាននិយាយថា ប្រធានាធិបតីអាមេរិក លោក Donald Trump និងក្រុមរបស់លោកបានទំនាក់ទំនងទៅកាន់អ៊ីរ៉ង់ថា ប្រសិនបើការសម្លាប់នៅតែបន្ត នឹងមានផលវិបាកធ្ងន់ធ្ងរ។

លោកស្រីថាប្រធានាធិបតីយល់នៅថ្ងៃនេះថា ការប្រហារជីវិតចំនួន ៨០០ នាក់ដែលត្រូវបានគ្រោងទុក និងសន្មត់ថានឹងធ្វើឡើងកាលពីម្សិលមិញត្រូវបានបញ្ឈប់ ដោយពុំបានផ្តល់ភស្តុតាងណាមួយដើម្បីគាំទ្រការអះអាងថា ការប្រហារជីវិតត្រូវបានបញ្ឈប់នោះទេ។

ឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិ លោក Mike Waltz បានប្រាប់ក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃព្រហស្បតិ៍ថា សហរដ្ឋអាមេរិកឈរនៅខាងប្រជាជនក្លាហានរបស់អ៊ីរ៉ង់ ហើយប្រធានាធិបតីលោក Donald Trump បានបញ្ជាក់យ៉ាងច្បាស់ថា ជម្រើសទាំងអស់នៅលើតុដើម្បីបញ្ឈប់ការសម្លាប់។ 

ជាការឆ្លើយតបលោក Gholamhossein Darzi ឯកអគ្គរដ្ឋទូតរងអ៊ីរ៉ង់ប្រចាំអង្គការសហប្រជាជាតិ បាននិយាយថា អ៊ីរ៉ង់ពុំស្វែងរកការកើនឡើង ឬការប្រឈមមុខដាក់គ្នាទេ ហើយបានចោទប្រកាន់លោក Waltz ថាបានងាកទៅរក ការកុហក ការបំភ្លៃការពិត និងយុទ្ធនាការផ្សព្វផ្សាយព័ត៌មានមិនពិតដោយចេតនា ដើម្បីលាក់បាំងការចូលរួមដោយផ្ទាល់របស់ប្រទេសលោក ក្នុងការដឹកនាំភាពចលាចលក្នុងប្រទេសអ៊ីរ៉ង់ទៅរកអំពើហិង្សា។  

ជាមួយគ្នានោះលោកបានព្រមានសហរដ្ឋអាមេរិកថា ការឈ្លានពានណាមួយនឹងត្រូវបានជួបប្រទះដោយការឆ្លើយតបដ៏ម៉ឺងម៉ាត់ សមាមាត្រ និងស្របច្បាប់៕