ការដាច់ចរន្តអគ្គិសនីនៅផ្លូវដែកក្នុងទីក្រុងតូក្យូបានរំខានដល់ការធ្វើដំណើរពេលព្រឹករបស់មនុស្សរាប់ពាន់នាក់នៅថ្ងៃសុក្រ ១៦ មករានេះ ខណៈខ្សែរថភ្លើងសំខាន់ៗពីររបស់ស្ថានីយ៍មមាញឹកបំផុតមួយចំនួនរបស់ពិភពលោក ត្រូវបានផ្អាកបន្ទាប់ពីមានរបាយការណ៍អំពីអគ្គិភ័យ។

ស្ថានីយផ្លូវដែកបាននិយាយថា ខ្សែរថភ្លើង Yamanote និង Keihin-Tohoku របស់ស្ថានីយ East Japan Railway ត្រូវបានផ្អាកគ្រប់ទិសដៅដោយគ្មានការបញ្ជាក់ពីពេលវេលាសម្រាប់ការបន្តឡើងវិញនោះទេ។

យោងតាមការចុះផ្សាយរបស់ទូរទស្សន៍រដ្ឋ NHKបានឲ្យដឹងថា មានរបាយការណ៍អំពីអគ្គិភ័យមួយនៅលើផ្លូវដែកជិតស្ថានីយ៍ Tamachi ជាកន្លែងដែលខ្សែរថភ្លើងទាំងពីរបានឈប់ភ្លាមៗមុនម៉ោង ៨ ព្រឹក ម៉ោងក្នុងស្រុក។

ទូរទស្សន៍ខាងលើនិយាយថា អណ្តាតភ្លើងបានឆាបឆេះចេញពីឧបករណ៍បំលែងនៅក្នុងតំបន់ផ្លូវដែក ហើយអគ្គិភ័យនោះបានរលត់ទៅវិញប្រហែល៣០នាទីក្រោយមក។

គេបានមើលឃើញក្រុមអ្នកដំណើរចុះពីរថភ្លើង Keihin-Tohoku ដែលជាប់គាំងនៅចន្លោះស្ថានីយ៍ និងដើរតាមបណ្តោយផ្លូវដែកដើម្បីជម្លៀសចេញ ដោយមានជំនួយពីក្រុមអ្នកពន្លត់អគ្គិភ័យ និងបុគ្គលិកផ្លូវដែក នៅក្នុងវីដេអូដែលចាក់ផ្សាយដោយបណ្តាញទូរទស្សន៍ NTV។

ខ្សែរថភ្លើង Yamanote ឆ្លងកាត់ស្ថានីយ៍នានា រួមទាំងទីក្រុង Shinjuku ដែលដឹកអ្នកដំណើរប្រហែល៣,៥ លាននាក់ជារៀងរាល់ថ្ងៃ៕