ប្រធានាធិបតីស្តីទីវ៉េណេស៊ុយអេឡា លោកស្រី Delcy Rodriguez កាលពីថ្ងៃព្រហស្បតិ៍ បានអំពាវនាវដល់សភានីតិប្បញ្ញត្តិឲ្យអនុម័តផែនការកែទម្រង់ឧស្សាហកម្មប្រេង ដើម្បីទាក់ទាញការវិនិយោគពីបរទេស និងលើកកម្ពស់ការងើបឡើងវិញនៃសេដ្ឋកិច្ចរបស់ប្រទេសនេះ។

នៅក្នុងរបាយការណ៍ប្រចាំឆ្នាំរបស់លោកស្រីដាក់ជូនសភានីតិប្បញ្ញត្តិក្នុងនាមស្ថាប័នរដ្ឋបាល លោកស្រី Rodriguez បាននិយាយថា កំណែទម្រង់ពាក់ព័ន្ធនឹងជួយកែលម្អបរិយាកាសប្រតិបត្តិការនៃឧស្សាហកម្មប្រេង និងបង្កើនសមត្ថភាពរបស់ខ្លួនសម្រាប់កិច្ចសហប្រតិបត្តិការពីខាងក្រៅ។

យោងតាមប្រធានាធិបតីស្តីទីរូបនេះ ការផលិតប្រេងរបស់ប្រទេសអាមេរិកខាងត្បូងនេះ បានឈានដល់ ១,២ លានបារ៉ែល ក្នុងខែធ្នូ ឆ្នាំមុន។ ប្រាក់ចំណូលពីការនាំចេញប្រេង នឹងត្រូវបានប្រើប្រាស់ជាចម្បងដើម្បីគាំទ្រដល់ការកសាងប្រព័ន្ធសុខភាពសាធារណៈ លើកកម្ពស់ការអភិវឌ្ឍសេដ្ឋកិច្ច និងជំរុញគម្រោងហេដ្ឋារចនាសម្ព័ន្ធ។

លោកស្រី Rodriguez បានលើកឡើងថា ប្រទេសវ៉េណេស៊ុយអេឡាបច្ចុប្បន្ន កំពុងស្ថិតនៅចំណុចរបត់ដ៏សំខាន់មួយ ហើយរដ្ឋាភិបាលនឹងស្វែងយល់ពីវិធីសាស្រ្តជាក់ស្តែង និងចម្រុះច្រើនជាងមុនសម្រាប់ការប្តូរប្រាក់បរទេស។

លោកស្រីបានបន្ថែមថា ប្រទេសនេះគួរតែដោះស្រាយបញ្ហាទំនាក់ទំនងរបស់ខ្លួន ជាមួយគ្រប់ភាគីទាំងអស់ រួមទាំងសហរដ្ឋអាមេរិកផងដែរ ដោយផ្អែកលើការគោរពគ្នាទៅវិញទៅមក៕