មេដឹកនាំគណបក្សប្រឆាំងរបស់ប្រទេសវ៉េណេស៊ុយអេឡា លោកស្រី Maria Corina Machado បានទទូចថា លោកស្រីនឹងត្រូវបានជ្រើសរើសជាប្រធានាធិបតី «នៅពេលវេលាដ៏សមស្របណាមួយមកដល់ » ទោះបីជាសហរដ្ឋអាមេរិកបានរារាំងលោកស្រីបន្ទាប់ពីការផ្តួលរំលំលោក Nicolas Maduro ក៏ដោយ។ ប្រធានាធិបតី លោក Donald Trump បានគាំទ្រអតីតអនុប្រធានាធិបតីរបស់លោក Maduro គឺលោកស្រី Delcy Rodriguez ជាមេដឹកនាំបណ្តោះអាសន្ននៃប្រទេសដែលសម្បូរប្រេង បន្ទាប់ពីប្រតិបត្តិការយោធាសហរដ្ឋអាមេរិកកាលពីថ្ងៃទី៣ ខែមករា ដើម្បីបណ្តេញលោក Maduro ចេញពីតំណែង និងចាប់ខ្លួនលោក។

លោកស្រី Machado បានប្រាប់កម្មវិធី Fox & Friends របស់ទូរសទស្សន៍ Fox News កាលពីថ្ងៃសុក្រ ទី១៦ ខែមករា បន្ទាប់ពីលោកស្រីបានជួបជាមួយលោក Trump នៅទីក្រុងវ៉ាស៊ីនតោនថា «ខ្ញុំជឿថា ខ្ញុំនឹងត្រូវបានជ្រើសរើសនៅពេលវេលាដ៏សមស្របណាមួយមកដល់ជាប្រធានាធិបតីរបស់ប្រទេសវ៉េណេស៊ុយអេឡា ជាប្រធានាធិបតីស្ត្រីដំបូងគេ»។

គណបក្សរបស់លោកស្រី Machado បានបង្ហាញភស្តុតាងថា លោក Maduro បានលួចបន្លំក្នុងការបោះឆ្នោតកាលពីឆ្នាំ២០២៤ ជាការអះអាងដែលគាំទ្រដោយទីក្រុងវ៉ាស៊ីនតោន និងសហគមន៍អន្តរជាតិភាគច្រើន។ ប៉ុន្តែលោក Trump បាននិយាយថា លោកស្រី Machado ពុំមានការគាំទ្រគ្រប់គ្រាន់ក្នុងចំណោមប្រជាជនវ៉េណេស៊ុយអេឡាទេ ហើយបានជ្រើសរើសលោកស្រី Rodriguez ដរាបណាលោកស្រីធ្វើតាមការចង់បានរបស់សហរដ្ឋអាមេរិកក្នុងការគ្រប់គ្រងប្រេងដ៏ច្រើនបំផុត។ កាលពីថ្ងៃព្រហស្បតិ៍សប្តាហ៍នេះ លោកស្រី Machado អាយុ៥៨ ឆ្នាំ បានបង្ហាញមេដាយរង្វាន់ណូបែលសន្តិភាពរបស់លោកស្រីជូនលោក Trump ក្នុងកិច្ចខិតខំប្រឹងប្រែងដើម្បីទទួលបានការគាំទ្រពីប្រធានាធិបតីសហរដ្ឋអាមេរិក។