លោក Gassim Cherif Mahamat រដ្ឋមន្ត្រីក្រសួងទំនាក់ទំនង និងជាអ្នកនាំពាក្យរដ្ឋាភិបាលឆាដ បាននិយាយកាលពីថ្ងៃសុក្រថា ទាហានឆាដមួយចំនួនត្រូវបានសម្លាប់ និងខ្លះទៀតរងរបួស បន្ទាប់ពីការប៉ះទង្គិចជាមួយកងកម្លាំងប៉ារ៉ាយោធាស៊ូដង់ តាមបណ្តោយព្រំដែនភាគខាងកើតនៃប្រទេសនេះ 

លោក Gassim Cherif បានប្រាប់អ្នកយកព័ត៌មានថា៖«កាលពីប៉ុន្មានថ្ងៃមុន មានការឈ្លានពានដោយភាគីសង្គ្រាមមួយនៅក្នុងជម្លោះដែលកំពុងបន្តរបស់ប្រទេសស៊ូដង់តាមបណ្តោយព្រំដែន។ ពួកគេបានចូលទៅក្នុងទឹកដីឆាដ ហើយកងកម្លាំងការពារជាតិ និងសន្តិសុខរបស់យើង បានស្នើសុំឲ្យពួកគេទម្លាក់អាវុធ។ ការប៉ះទង្គិចគ្នា បានកើតឡើង ដោយអំឡុងពេលនោះ ទាហានមួយចំនួនរបស់យើង ត្រូវបានសម្លាប់ និង     ខ្លះទៀត រងរបួស»។

លោកបានថ្កោលទោសចំពោះការវាយប្រហារនេះ និងបានចេញការព្រមានចុងក្រោយដល់ភាគីជម្លោះនៅស៊ូដង់។ លោកបានបន្ថែមថា៖«យើងសូមអំពាវនាវដល់ភាគីទាំងអស់ដែលពាក់ព័ន្ធនឹងជម្លោះនេះឲ្យ បញ្ឈប់ការរំលោភបំពានទាំងអស់លើទឹកដីឆាដ»។

ប្រទេសឆាដមានព្រំដែនវែង និងងាយស្រួលឆ្លងកាត់ជាមួយប្រទេសស៊ូដង់។ យោងតាមប្រព័ន្ធផ្សព្វផ្សាយក្នុងស្រុក កងកម្លាំងប៉ារ៉ាយោធាស៊ូដង់ បានធ្វើការវាយប្រហារជាច្រើនលើក នៅជិតព្រំដែនឆាដ៕