រដ្ឋាភិបាលនានាបានបង្ហាញការប្រុងប្រយ័ត្នជាការឆ្លើយតបទៅនឹងការអញ្ជើញរបស់ប្រធានាធិបតីសហរដ្ឋអាមេរិកលោក Donald Trump ឱ្យចូលរួមក្នុងគំនិតផ្តួចផ្តើម «ក្រុមប្រឹក្សាសន្តិភាព» របស់លោក ដែលមានគោលបំណងដោះស្រាយជម្លោះសកល។មានតែប្រទេសហុងគ្រីទេ ដែលមេដឹកនាំរបស់ខ្លួនជិតស្និទ្ធនឹងលោក Trump បានទទួលយកការអញ្ជើញនេះដោយបើកចំហ ខណៈប្រទេសដទៃទៀតបានចៀសវាងការអត្ថាធិប្បាយជាសាធារណៈដោយសារតែការព្រួយបារម្ភអំពីរបៀបដែលគំនិតផ្តួចផ្តើមនេះអាចប៉ះពាល់ដល់អង្គការសហប្រជាជាតិ។ គំនិតផ្តួចផ្តើមនេះត្រូវបានផ្ញើទៅកាន់ប្រទេសប្រហែល៦០ ហើយបានចាប់ផ្តើមទៅដល់រដ្ឋធានីអឺរ៉ុបកាលពីចុងសប្តាហ៍មុននេះ។

ក្រុមប្រឹក្សាដែលបានស្នើឡើងនឹងត្រូវបានដឹកនាំដោយលោក Trump អស់មួយជីវិត ដោយចាប់ផ្តើមជាមួយនឹងការដោះស្រាយជម្លោះហ្កាហ្សា និងពង្រីកដល់ជម្លោះសកលផ្សេងទៀត។ ប្រទេសនានាអាចមានអាណត្តិកំណត់ត្រឹមបីឆ្នាំ លុះត្រាតែពួកគេបានបង់ប្រាក់១ ពាន់លានដុល្លារសម្រាប់សមាជិកភាពអចិន្ត្រៃយ៍។ សេតវិមានបានហៅរឿងនេះថាជាឱកាសសម្រាប់ប្រទេសដែលបង្ហាញពីការប្តេជ្ញាចិត្តចំពោះសន្តិភាព និងសន្តិសុខ ដើម្បីទទួលបានសមាជិកភាពជាបន្តបន្ទាប់។

នាយករដ្ឋមន្ត្រីអ៊ីតាលី លោកស្រី Giorgia Meloni បានបង្ហាញពីភាពត្រៀមខ្លួនជាស្រេចក្នុងការចូលរួមចំណែក ទោះពុំច្បាស់ថាតើលោកស្រីបានសំដៅជាពិសេសទៅលើហ្កាហ្សា ឬកិច្ចខិតខំប្រឹងប្រែងសន្តិភាពកាន់តែទូលំទូលាយជាងនេះក៏ដោយ។ នាយករដ្ឋមន្ត្រីកាណាដា លោក Mark Carney បានយល់ព្រមចូលរួមជាមួយក្រុមប្រឹក្សាសន្តិភាពសម្រាប់តំបន់ហ្កាហ្សាជាគោលការណ៍ ខណៈអាណត្តិនៃគំនិតផ្តួចផ្តើមនេះត្រូវបានអនុញ្ញាតដោយក្រុមប្រឹក្សាសន្តិសុខអង្គការសហប្រជាជាតិឱ្យផ្តោតតែលើហ្កាហ្សារហូតដល់ឆ្នាំ២០២៧។

អ្នកការទូតជាច្រើនមានការភ័យខ្លាចថាគំនិតផ្តួចផ្តើមនេះអាចធ្វើឱ្យប៉ះពាល់ដល់តួនាទីរបស់អង្គការសហប្រជាជាតិប្រសិនបើត្រូវបានអនុវត្ត។ មានការលើកឡើងថា លោក Trump បានមើលឃើញអាណត្តិកាន់តែទូលំទូលាយសម្រាប់ក្រុមប្រឹក្សាលើសពីតំបន់ហ្កាហ្សា ដើម្បីដោះស្រាយជម្លោះផ្សេងទៀតដែលលោកអះអាងថាបានដោះស្រាយរួច។

បណ្ដាមេដឹកនាំមកពីប្រទេសបារាំង អាល្លឺម៉ង់ អ៊ីតាលី ហុងគ្រី អូស្ត្រាលី កាណាដា គណៈកម្មការអឺរ៉ុប និងមហាអំណាចសំខាន់ៗនៅមជ្ឈិមបូព៌ាត្រូវបានអញ្ជើញឱ្យចូលរួម៕