ប្រធានាធិបតីប្រទេសស៊ីរី លោក Ahmed al-Sharaa បានប្រកាសកាលពីថ្ងៃអាទិត្យ ទី១៨ ខែមករា នូវកិច្ចព្រមព្រៀងមួយជាមួយប្រមុខកងកម្លាំងប្រជាធិបតេយ្យស៊ីរីដឹកនាំដោយក្រុមឃឺដ លោក Mazloum Abdi ដែលរួមមានទាំងបទឈប់បាញ់បន្ទាប់ពីកងកម្លាំងរដ្ឋាភិបាលបានរុលទៅមុខចូលក្នុងតំបន់ដែលគ្រប់គ្រងដោយក្រុមឃឺដនៅភាគខាងជើង និងភាគខាងកើត។

សហរដ្ឋអាមេរិក ដែលជាច្រើនឆ្នាំមកនេះបានគាំទ្រអ្នកប្រយុទ្ធឃឺដស៊ីរី ប៉ុន្តែបច្ចុប្បន្នក៏ជាសម្ព័ន្ធមិត្តសំខាន់របស់ទីក្រុងដាម៉ាសផងដែរនោះ បានស្វាគមន៍កិច្ចព្រមព្រៀងនេះ ដោយលោក Tom Barrack បេសកជន បានចាត់ទុកថាជា «ចំណុចផ្លាស់ប្តូរដ៏សំខាន់»និងសរសើរដល់«កិច្ចខិតខំប្រឹងប្រែងប្រកបដោយស្ថាបនា»របស់ភាគីទាំងពីរ។ បន្ទាប់ពីជួបជាមួយលោក Barrack នៅទីក្រុងដាម៉ាស លោក Sharaa បានប្រាប់អ្នកសារព័ត៌មានថា «ខ្ញុំសូមឱ្យមានបទឈប់បាញ់ទាំងស្រុង»។

លោកបាននិយាយថា ជំនួបជាមួយលោក Abdi ប្រមុខកងកម្លាំងប្រជាធិបតេយ្យស៊ីរី ត្រូវបានពន្យារពេលរហូតដល់ថ្ងៃច័ន្ទនេះដោយសារតែបរិយាកាសមិនអំណោយផល ប៉ុន្តែបាននិយាយថា «ដើម្បីធ្វើឲ្យស្ថានការណ៍ស្ងប់ស្ងាត់ យើងបានសម្រេចចុះហត្ថលេខាលើកិច្ចព្រមព្រៀងមួយ»។ លោកនិយាយថា ព័ត៌មានលម្អិតនឹងត្រូវបញ្ចប់ចុងក្រោយនៅថ្ងៃចន្ទនេះ ហើយកិច្ចព្រមព្រៀងគឺផ្អែកលើ«ស្មារតី»នៃកិច្ចព្រមព្រៀងដែលត្រូវបានចុះហត្ថលេខាកាលពីខែមីនា។ លោកបានជំរុញឱ្យកុលសម្ព័ន្ធអារ៉ាប់ដែលបង្កើតប្រជាជនភាគច្រើននៅក្នុងខេត្ត Raqa និង Deir Ezzor កាន់កាប់ដោយក្រុមឃឺដនៅភាគខាងជើង និងភាគខាងកើតប្រទេសស៊ីរី «រក្សាភាពស្ងប់ស្ងាត់ ដើម្បីត្រួសត្រាយផ្លូវសម្រាប់ការអនុវត្តជាបន្តបន្ទាប់នៃបទប្បញ្ញត្តិកិច្ចព្រមព្រៀងរហូតដល់យើងឈានដល់ភាពស្ងប់ស្ងាត់ទាំងស្រុងនៅក្នុងប្រទេសស៊ីរី»។ លោកសង្ឃឹមថាកិច្ចព្រមព្រៀងនេះនឹងជា «ការចាប់ផ្តើមដ៏ល្អ» សម្រាប់ការអភិវឌ្ឍ និងការកសាងឡើងវិញ និងជា «ឱកាសសម្រាប់សន្តិសុខ និងស្ថិរភាព» ហើយ «ប្រទេសស៊ីរីនឹងបញ្ចប់ស្ថានភាពខ្វែងគំនិតគ្នានាពេលបច្ចុប្បន្នរបស់ខ្លួន និងឆ្ពោះទៅរកស្ថានភាពឯកភាព និងវឌ្ឍនភាព»។