អ្នកឃ្លាំមើលម្នាក់បាននិយាយកាលពីថ្ងៃអាទិត្យ ទី១៨ ខែមករា ថា ដំណើរការអ៊ីនធឺណិតដែលត្រូវបានកំណត់ បានតភ្ជាប់ឡើងវិញនៅក្នុងប្រទេសអ៊ីរ៉ង់ រយៈពេល១០ថ្ងៃបន្ទាប់ពីការដាច់ចរន្តផ្នែកទំនាក់ទំនងដែលក្រុមសិទ្ធិមនុស្សបាននិយាយថាមានគោលបំណងបិទបាំងការបង្ក្រាបការតវ៉ាដោយហិង្សាដែលបានសម្លាប់មនុស្សរាប់ពាន់នាក់។

ប្រធានាធិបតីអ៊ីរ៉ង់ បានព្រមានថាការវាយប្រហារលើមេដឹកនាំកំពូលរបស់ប្រទេសនេះនឹងជាការប្រកាសសង្គ្រាម ក្នុងការឆ្លើយតបជាក់ស្តែងចំពោះសមភាគីអាមេរិក លោក Donald Trump ដែលនិយាយថា វាដល់ពេលដែលត្រូវស្វែងរកមេដឹកនាំថ្មីនៅក្នុងប្រទេសអ៊ីរ៉ង់។

បាតុកម្ម ដែលបង្កឡើងកាលពីចុងខែធ្នូដោយសារកំហឹងជុំវិញការលំបាកផ្នែកសេដ្ឋកិច្ច បានផ្ទុះឡើងទៅជាការតវ៉ាដែលត្រូវបានគេមើលឃើញយ៉ាងរាលដាល ថាជាបញ្ហាប្រឈមធំបំផុតចំពោះថ្នាក់ដឹកនាំអ៊ីរ៉ង់ ក្នុងរយៈពេលជាច្រើនឆ្នាំមកនេះ។

ការប្រមូលផ្តុំគ្នា បានថយចុះបន្ទាប់ពីការបង្ក្រាបដែលក្រុមសិទ្ធិមនុស្សបានចាត់ទុកថាជា«ការសម្លាប់រង្គាល» ដែលត្រូវបានអនុវត្តដោយកងកម្លាំងសន្តិសុខក្រោមការបិទបាំងនៃការផ្តាច់ចរន្តផ្នែកទំនាក់ទំនង ចាប់ផ្តើមកាលពីថ្ងៃទី៨ ខែមករា។

មន្ត្រីអ៊ីរ៉ង់ បាននិយាយថា បាតុកម្មនេះគឺដោយសន្តិវិធីមុនពេលប្រែទៅជា «កុបកម្ម» ហើយបានដាក់កំហុសទៅលើឥទ្ធិពលបរទេសពីសត្រូវសំខាន់ៗរបស់អ៊ីរ៉ង់ មានសហរដ្ឋអាមេរិក និងអ៊ីស្រាអែល។

លោក Trump ដែលបានចូលរួមក្នុងសង្គ្រាមរយៈពេល១២ថ្ងៃរបស់អ៊ីស្រាអែលប្រឆាំងប្រទេសអ៊ីរ៉ង់កាលពីខែមិថុនា បានគំរាមដដែលៗអំពីសកម្មភាពយោធាថ្មីប្រឆាំងទីក្រុងតេអេរ៉ង់ ប្រសិនបើក្រុមបាតុករនៅតែត្រូវបានសម្លាប់។