ប្រតិភូមកពីគណបក្សកុម្មុយនិស្តដែលកំពុងកាន់អំណាច របស់វៀតណាម ត្រៀមប្រមូលផ្តុំគ្នានៅថ្ងៃចន្ទ (១៩ មករា) នេះ ក្រោមសន្តិសុខយ៉ាងតឹងរ៉ឹង សម្រាប់សមាជដ៏សំខាន់ ដែលនឹងជ្រើសរើសមេដឹកនាំកំពូលរបស់រដ្ឋឯកបក្សមួយនេះ និងកំណត់គោលដៅសេដ្ឋកិច្ចសម្រាប់រយៈពេលដែលនៅសល់នៃទសវត្សរ៍នេះ។

ព្រឹត្តិការណ៍រយៈពេល ១សប្តាហ៍ ដែលដំណើរការក្រោមច្បាប់ចែងមិនច្បាស់លាស់ និងកោះប្រជុំរៀងរាល់ ៥ឆ្នាំម្តង អាចពង្រឹង និងពង្រីកអំណាចសម្រាប់អគ្គលេខាធិការបច្ចុប្បន្នរបស់គណបក្ស គឺលោក តូ ឡឹម ដែលបានដាក់ចេញកំណែទម្រង់រដ្ឋបាលយ៉ាងទូលំទូលាយនៅក្នុងប្រទេស និងបានក្លាយជាមុខមាត់សាធារណៈរបស់វៀតណាម នៅក្រៅប្រទេស។

ប្រតិភូប្រហែល ១.៦០០រូប នឹងជ្រើសរើសគណៈកម្មាធិការកណ្តាល ដែលមានសមាជិក ២០០រូប ដែលបន្ទាប់មក កម្មាធិការនោះនឹងជ្រើសរើសសមាជិកកម្រិតខ្ពស់ចំនួន ១៧ ទៅ ១៩ រូប នៃការិយាល័យនយោបាយ ដែលក្នុងនោះ តំណែងប្រធានបក្សក៏ត្រូវបានជ្រើសតាំងផងដែរ។

ប្រភពមន្ត្រីផ្ទៃក្នុងបានប្រាប់សារព័ត៌មានរ៉យទ័រថា លោក ឡឹម កំពុងស្វះស្វែងរក្សាតួនាទីជាប្រធានបក្សរបស់លោក ព្រមទាំងតំណែងប្រធានរដ្ឋផងដែរ ដែលបច្ចុប្បន្ន កាន់តំណែងដោយមេដឹកនាំយោធា។ មន្ត្រីជាច្រើននិយាយថា សភាទំនងជានឹងបញ្ជាក់ឱ្យលោក ឡឹម បន្តធ្វើជាអគ្គលេខាធិការបក្ស ប៉ុន្តែការសម្រេចលើតំណែងប្រធានាធិបតី នឹងត្រូវធ្វើឡើងក្នុងកិច្ចប្រជុំនៅពេលក្រោយទៀត ហើយលទ្ធផលមិនសូវច្បាស់លាស់នោះទេ៕