ប្រធានរៀបចំការបោះឆ្នោតរបស់ប្រទេសអ៊ុយក្រែន បានលើកឡើងថា អ៊ុយក្រែននឹងជួបប្រទះជាមួយបញ្ហាប្រឈមដ៏ធំ ក្នុងការរៀបចំការបោះឆ្នោតលើកដំបូងរបស់ខ្លួន ចាប់តាំងពីមានការឈ្លានពានរបស់រុស្ស៊ី ក្នុងឆ្នាំ២០២២ ដ្បិតហេដ្ឋារចនាសម្ព័ន្ធរបស់ប្រទេសត្រូវបានបំផ្លាញ ហើយមនុស្សរាប់លាននាក់ត្រូវបានបម្លាស់ទីលំនៅដោយសារសង្គ្រាម។

ក្នុងបទសម្ភាសន៍ពិសេសជាមួយប្រព័ន្ធផ្សព្វផ្សាយអន្តរជាតិមួយ លោក Oleh Didenko ប្រធានគណៈកម្មការរៀបចំការបោះឆ្នោតកណ្តាលរបស់អ៊ុយក្រែន បានប្រាប់ទីភ្នាក់ងារសារព័ត៌មាន Reuters ថា ការធ្វើបច្ចុប្បន្នភាពបញ្ជីឈ្មោះអ្នកបោះឆ្នោតរបស់អ៊ុយក្រែន និងការរៀបចំឲ្យបានត្រឹមត្រូវ សម្រាប់ការបោះឆ្នោត នឹងត្រូវការពេលវេលាច្រើន។

ស្របពេលមានកិច្ចខិតខំប្រឹងប្រែងផ្នែកការទូត ដើម្បីបញ្ចប់សង្គ្រាម ប្រធានាធិបតីអាមេរិក លោក Donald Trump បានទាមទារឲ្យអ៊ុយក្រែនរៀបចំការបោះឆ្នោត ទោះបីជាដំណើរការនេះត្រូវបានហាមឃាត់ ក្រោមច្បាប់អាជ្ញាសឹកក៏ដោយ ដែលចូលជាធរមានចាប់តាំងពីមានការឈ្លានពាននេះ ហើយប្រជាជនអ៊ុយក្រែនភាគច្រើន ប្រឆាំងនឹងការបោះឆ្នោតក្នុងសម័យសង្គ្រាមបែបនេះក៏ដោយ។

ការរៀបចំការបោះឆ្នោតឲ្យបានឆាប់តាមដែលអាចធ្វើទៅបាន គឺជាផ្នែកមួយនៃក្របខ័ណ្ឌសន្តិភាព ២០ចំណុចដែលអ្នកចរចាអ៊ុយក្រែន និងសហរដ្ឋអាមេរិក បានខិតខំធ្វើការ ដើម្បីបញ្ចប់ក្នុងរយៈពេលប៉ុន្មានខែថ្មីៗនេះ។

ក្រោមសម្ពាធពីលោក Trump លោក Zelenskiy បាននិយាយកាលពីខែមុនថា លោកបានត្រៀមខ្លួនរួចរាល់ហើយក្នុងការរៀបចំការបោះឆ្នោត ប្រសិនបើសហរដ្ឋអាមេរិក និងសម្ព័ន្ធមិត្តផ្សេងទៀត អាចធានាសុវត្ថិភាពដល់ដំណើរការបោះឆ្នោត។

យ៉ាងណាក្ដី លោក Didenko បាននិយាយថា បទឈប់បាញ់ និងលក្ខខណ្ឌសុវត្ថិភាព សម្រាប់អ្នកបោះឆ្នោត គឺជាតម្រូវការជាមុន សម្រាប់ការបោះឆ្នោតណាមួយ។ ក្រៅពីនេះ អ៊ុយក្រែនជួបនូវបញ្ហាប្រឈមជាច្រើន ដែលមានដូចជាពលរដ្ឋរាប់លាននាក់រស់នៅក្រៅប្រទេស ឬនៅសមរភូមិជួរមុខ ហេដ្ឋារចនាសម្ព័ន្ធត្រូវបានបំផ្លាញ ហើយប្រព័ន្ធចុះឈ្មោះបោះឆ្នោតមិនរួមបញ្ចូលការធ្វើដំណើរទេសន្តរប្រវេសន៍ទេ៕