ក្រុមពន្លត់អគ្គិភ័យក្នុងប្រទេសឈីលី កំពុងបន្តទប់ស្កាត់ចំហេះព្រៃដែលកាន់តែធ្ងន់ធ្ងរឡើងកាលពីថ្ងៃចន្ទ (១៩ មករា) ដោយសម្លាប់មនុស្សយ៉ាងហោចណាស់ ១៩នាក់ហើយ និងបង្ខំឱ្យមនុស្សរាប់ម៉ឺននាក់ជម្លៀសចេញពីផ្ទះសម្បែងរបស់ពួកគេ ខណៈអណ្ដាតភ្លើងបានលេបត្របាក់ផ្ទៃដីរាប់ម៉ឺនហិកតានៅភាគកណ្តាល និងភាគខាងត្បូងនៃប្រទេស។

មនុស្សជាង ៥០.០០០នាក់ ត្រូវបានជម្លៀសចេញពីតំបន់ Ñuble និង Biobío ដែលរងផលប៉ះពាល់ ចម្ងាយប្រហែល ៥០០គីឡូម៉ែត្រ ភាគខាងត្បូងនៃរដ្ឋធានីសាន់ត្យាហ្គោ។ ប្រធានាធិបតីឈីលី លោក Gabriel Boric បានប្រកាសអាសន្នក្នុងតំបន់ទាំងនោះ និងព្រមានពីមហន្តរាយកាន់តែបំផ្លិចបំផ្លាញ។

យោងតាមសេវាជាតិសម្រាប់ការបង្ការគ្រោះមហន្តរាយឈីលី បានឱ្យដឹងថា ចំហេះចំនួន ១៥កន្លែង នៅតែសកម្មគិតត្រឹមថ្ងៃចន្ទ បន្ទាប់ពីអណ្ដាតភ្លើងបានចាប់ផ្តើមដំបូងកាលពីថ្ងៃអាទិត្យ ក្នុងប្រទេសអាមេរិកខាងត្បូងមួយនេះ។ ទីភ្នាក់ងារនេះបាននិយាយថា ចំហេះបានដុតបំផ្លាញផ្ទះសម្បែង យានយន្ត ហេដ្ឋារចនាសម្ព័ន្ធ និងព្រៃឈើអស់យ៉ាងច្រើន។

ក្រុមមន្ត្រីឈីលី បាននិយាយថា ផ្ទះសម្បែងលើសពី ៣០០ខ្នង ត្រូវបានបំផ្លាញដោយចំហេះ ខណៈលំនៅឋានជាង ១.១០០ខ្នង ផ្សេងទៀតរងការខូចខាត។ នគរបាលកំពុងស៊ើបអង្កេតមូលហេតុនៃចំហេះព្រៃនេះដែលរាលដាលជាបន្តបន្ទាប់ ខណៈលោកប្រធានាធិបតី Boric បាននិយាយថា ក្នុងអត្រា «៩៩% នៃករណីចំហេះព្រៃ» ក្នុងប្រទេសឈីលី គឺសុទ្ធតែបង្កឡើងដោយមនុស្ស៕