ប្រធានវេទិកាសេដ្ឋកិច្ចពិភពលោក (WEF) បានសរសើរ «ពេលវេលាប្រវត្តិសាស្ត្រ» ក្នុងពិធីបើកកិច្ចប្រជុំនៅទីក្រុងដាវ៉ូស( Davos ) ប្រទេសស្វីស កាលពីថ្ងៃចន្ទ ១៩ មករា សប្ដាហ៍នេះ។ 

លោក បូហ្គ័រ ប្រេន (Borge Brende) បានថ្លែងក្នុងសុន្ទរកថាទៅកាន់ប្រតិភូពីឆាកនៃសាលសភាថា នេះជាពេលវេលានៃភាពមិនច្បាស់លាស់ ប៉ុន្តែក៏ជាលទ្ធភាពផងដែរ មិនមែនជាពេលវេលាដើម្បីដកថយទេ ប៉ុន្តែជាពេលវេលាដើម្បីក្រោកឈរឡើង។ 

ក្រុមអ្នករៀបចំវេទិកាសេដ្ឋកិច្ចពិភពលោក បាននិយាយថា ប្រតិភូជាង ៣.០០០នាក់ មកពីប្រទេសជាង ១៣០ នឹងចូលរួមនៅឆ្នាំនេះ រួមទាំងប្រមុខរដ្ឋ និងរដ្ឋាភិបាលចំនួន ៦៤រូប ជាពិសេសមកពីប្រទេសដែលមានសេដ្ឋកិច្ចកំពុងរីកចម្រើន។

របៀបវារៈវេទិកានេះត្រូវបានគ្របដណ្ដប់ដោយចំណាត់ការគោលនយោបាយដ៏គួរឱ្យភ្ញាក់ផ្អើលរបស់ប្រធានាធិបតីសហរដ្ឋអាមេរិក លោក Donald Trump រួមទាំងការទាមទាររបស់លោកក្នុងរយៈពេលប៉ុន្មានថ្ងៃថ្មីៗនេះ ដែលចង់កាន់កាប់កោះ Greenland របស់ប្រទេសដាណឺម៉ាក៕