រុស្ស៊ី បានវាយប្រហាររដ្ឋធានីគីវ និងទីក្រុងជាច្រើនផ្សេងទៀតរបស់អ៊ុយក្រែន ដោយមីស៊ីលបាលីស្ទីកកាលពីយប់ថ្ងៃចន្ទឈានចូលថ្ងៃអង្គារ២០ មករា នេះ ខណៈប្រទេសនេះកំពុងប្រឈមនឹងសីតុណ្ហភាពត្រជាក់ខ្លាំង និងវិបត្តិថាមពលកាន់តែធ្ងន់ធ្ងរ។ 

បច្ចុប្បន្នរដ្ឋធានីគីវ កំពុងស៊ូទ្រាំនឹងរដូវរងាដ៏លំបាកបំផុតនៃសង្គ្រាមទ្រង់ទ្រាយធំរបស់រុស្ស៊ី ដែលបណ្តាលមកពីការវាយប្រហារឥតឈប់ឈររបស់រុស្ស៊ីលើរោងចក្រថាមពលរបស់រដ្ឋធានីនេះ។ លោកប្រធានាធិបតី Volodymyr Zelenskyy បានប្រកាសពីភាពអាសន្នក្នុងវិស័យថាមពលកាលពីថ្ងៃទី ១៤ ខែមករា ដោយសារតែការវាយប្រហារកាន់តែខ្លាំង។

សារព័ត៌មាន Kyiv Independent បានរាយការណ៍ថា សំឡេងផ្ទុះត្រូវបានឮនៅក្នុងរដ្ឋធានីគីវ នៅម៉ោងប្រហែល ២ ព្រឹកថ្ងៃអង្គារនេះ។ជាមួយគ្នានេះ កងទ័ពអាកាសបានព្រមានថា មីស៊ីលផ្លោងបាលីស្ទីករបស់រុស្ស៊ីកំពុងកំណត់គោលដៅរដ្ឋធានី។

មិនយូរប៉ុន្មាន កងទ័ពអាកាសបានចេញការព្រមានមីស៊ីលផ្លោងបន្ថែមសម្រាប់តំបន់គីវ ទីក្រុង Dnipropetrovsk និងទីក្រុង Vinnytsia។ បន្ទាប់មក យោធាបាននិយាយថា រុស្ស៊ីបានបញ្ចេញយន្តហោះទម្លាក់គ្រាប់បែក MiG-31 ដែលជាយន្តហោះផ្ទុកមីស៊ីលលឿនជាងសំឡេង Kinzhal។

លោក Tymur Tkachenko ប្រធានរដ្ឋបាលយោធារដ្ឋធានីគីវ បានរាយការណ៍ថា ការវាយប្រហារទាំងនេះរហូតមកដល់ពេលនេះបានបំផ្លាញអគារដែលមិនមែនជាលំនៅឋាននៅក្នុងសង្កាត់តែមួយ។ នៅកន្លែងមួយផ្សេងទៀត យានយន្តមួយចំនួនបានឆាបឆេះដោយសារការវាយប្រហារនោះ៕