ទីបញ្ជាការការពារដែនអាកាសអាមេរិកខាងជើង (NORAD) កាលពីថ្ងៃចន្ទ (ទី១៩ ខែមករា ឆ្នាំ២០២៦) បានឲ្យដឹងថា យន្តហោះរបស់អង្គការនេះ នឹងទៅដល់មូលដ្ឋានយោធាអាមេរិកមួយ នៅលើកោះ Greenland ក្នុងពេលឆាប់ៗនេះ សម្រាប់សកម្មភាព «ដែលបានគ្រោងទុកជាយូរមកហើយ»។

ការប្រកាសពី NORAD ដែលជាអង្គការយោធារួមគ្នា រវាងសហរដ្ឋអាមេរិក-កាណាដា សម្រាប់ការត្រួតពិនិត្យ និងការពារដែនអាកាស បានកើតឡើងចំពេលមានភាពតានតឹងកើនឡើង ជុំវិញការទាមទាររបស់លោកប្រធានាធិបតី Donald Trump ដើម្បីឲ្យសហរដ្ឋអាមេរិកគ្រប់គ្រងទឹកដីស្វយ័តរបស់ប្រទេសដាណឺម៉ាក។

សេចក្តីថ្លែងការណ៍នេះ មិនបានពិពណ៌នានោះឡើយ អំពីលក្ខណៈនៃសកម្មភាពដែលបានគ្រោងទុក នៅមូលដ្ឋានអវកាស Pituffik ដោយគ្រាន់តែបានឲ្យដឹងថា មានគោលបំណងធ្វើ «កិច្ចសហប្រតិបត្តិការការពារជាតិ»។ សេចក្ដីថ្លែងការណ៍នេះបានបន្ថែមថា សកម្មភាពទាំងនោះត្រូវបានសម្របសម្រួលជាមួយប្រទេសដាណឺម៉ាក ហើយកោះ Greenland ត្រូវបានជូនដំណឹងរួចហើយ។

NORAD បានបញ្ជាក់ថា យន្តហោះដែលនឹងទៅដល់ នឹងធ្វើប្រតិបត្តិការរួមជាមួយយន្តហោះមកពីមូលដ្ឋាននានា នៅសហរដ្ឋអាមេរិក និងកាណាដា។ NORAD បានឲ្យដឹងទៀតថា «យន្តហោះទាំងនោះនឹងគាំទ្រសកម្មភាព NORAD ដែលបានគ្រោងទុកជាយូរមកហើយជាច្រើន ដោយបង្កើតនូវកិច្ចសហប្រតិបត្តិការការពារជាតិដ៏យូរអង្វែង រវាងសហរដ្ឋអាមេរិក និងកាណាដា ក៏ដូចជាព្រះរាជាណាចក្រដាណឺម៉ាក»។

សេចក្តីថ្លែងការណ៍នេះ បានបន្ថែមថា NORAD «អនុវត្តតាមទម្លាប់នូវប្រតិបត្តិការជាបន្ត និងយ៉ាងទូលំទូលាយ ដើម្បីការពារអាមេរិកខាងជើង»៕