ប្រភពជាច្រើនដែលដឹងបញ្ហានេះ បានប្រាប់ប្រព័ន្ធផ្សព្វផ្សាយក្នុងសប្តាហ៍នេះថា សហរដ្ឋអាមេរិក មានផែនការកាត់បន្ថយចំនួនបុគ្គលិកដែលខ្លួនដាក់ឱ្យឈរជើងនៅមជ្ឈមណ្ឌលបញ្ជាការសំខាន់ៗជាច្រើនកន្លែងរបស់សម្ព័ន្ធយោធាណាតូ ក្នុងជំហានមួយដែលអាចបង្កើនក្ដីបារម្ភកាន់តែខ្លាំងនៅអឺរ៉ុប អំពីការប្តេជ្ញាចិត្តរបស់ទីក្រុងវ៉ាស៊ីនតោន ចំពោះសម្ព័ន្ធមិត្តការពារជាតិរបស់ពួកគេ។

ប្រភពព័ត៌មានដែលស្នើសុំមិនបញ្ចេញឈ្មោះទាំងនោះបាននិយាយថា ជាផ្នែកមួយនៃចំណាត់ការនេះ — ដែលរដ្ឋបាលលោក Trump បានជូនដំណឹងដល់រដ្ឋធានីអឺរ៉ុបមួយចំនួនរួចទៅហើយ — សហរដ្ឋអាមេរិកនឹងលុបចោលចំនួនឈរជើងប្រហែល ២០០នាក់ ពីអង្គភាពរបស់ណាតូ ដែលត្រួតពិនិត្យ និងរៀបចំផែនការប្រតិបត្តិការយោធា និងចារកម្មរបស់សម្ព័ន្ធមិត្ត។

ប្រភពបន្តថា ក្នុងចំណោមអង្គភាពដែលនឹងរងផលប៉ះពាល់ គឺជាមជ្ឈមណ្ឌលចារកម្មសម្ងាត់រួមបញ្ចូលគ្នាមួយ របស់អង្គការណាតូ ដែលមានមូលដ្ឋាននៅចក្រភពអង់គ្លេស និងបញ្ជាការកងកម្លាំងប្រតិបត្តិការពិសេសសម្ព័ន្ធមិត្ត នៅទីក្រុងព្រុចសែល។ ប្រភពបន្ថែមថា អង្គភាពមូលដ្ឋាននៅព័រទុយហ្គាល់ ឈ្មោះ STRIKFORNATO ដែលត្រួតពិនិត្យប្រតិបត្តិការដែនសមុទ្រមួយចំនួន ក៏នឹងត្រូវកាត់បន្ថយផងដែរ ព្រមទាំងអង្គភាពណាតូស្រដៀងគ្នាជាច្រើនទៀត។

ជំហានទាំងនេះស្របគ្នាយ៉ាងទូលំទូលាយជាមួយនឹងចេតនាដែលបានបញ្ជាក់ របស់រដ្ឋបាលលោក Trump ក្នុងការផ្លាស់ប្តូរធនធានបន្ថែមទៀតឆ្ពោះទៅរកអឌ្ឍគោលខាងលិច។ គួរឱ្យដឹងថា ការផ្លាស់ប្តូរទាំងនេះគឺតិចតួចណាស់ បើធៀបនឹងទំហំកងកម្លាំងយោធាអាមេរិក ដែលឈរជើងនៅអឺរ៉ុបទាំងមូល ហើយនេះអាចពុំមែនជាសញ្ញានៃការផ្លាស់ប្តូរកាន់តែទូលំទូលាយរបស់ទីក្រុងវ៉ាស៊ីនតោន ចេញពីទ្វីបអឺរ៉ុបនោះទេ។ បុគ្គលិកយោធាអាមេរិកប្រហែល ៨ម៉ឺននាក់ ឈរជើងនៅអឺរ៉ុប ដែលស្ទើរតែពាក់កណ្តាលនៃតួលេខនេះគឺនៅអាល្លឺម៉ង់៕