បេសកជនពិសេសរបស់លោកប្រធានាធិបតីអាមេរិក Donald Trump និងលោកប្រធានាធិបតីរុស្ស៊ី Vladimir Putin បាននិយាយកាលពីថ្ងៃអង្គារ (២០ មករា) ថា កិច្ចប្រជុំរបស់ភាគីទាំងពីរនៅទីក្រុងដាវ៉ូស ប្រទេសស្វីស ស្តីពីលទ្ធភាពនៃកិច្ចព្រមព្រៀងសន្តិភាពនាពេលអនាគតដើម្បីបញ្ចប់សង្គ្រាមអ៊ុយក្រែន គឺមានភាព «វិជ្ជមានខ្លាំងណាស់» និង «ប្រកបដោយលក្ខណៈស្ថាបនា»។

សហរដ្ឋអាមេរិក បានធ្វើកិច្ចចរចាជាច្រើនលើកជាមួយរុស្ស៊ី និងជំនួបដាច់ដោយឡែកជាមួយមេដឹកនាំក្រុងគីវ និងអឺរ៉ុប ដើម្បីបញ្ចប់សង្គ្រាមនៅអ៊ុយក្រែន ឱ្យបានឆាប់ ប៉ុន្តែមកទល់ពេលនេះ ពុំទាន់មានកិច្ចព្រមព្រៀងណាមួយត្រូវសម្រេចបាននៅឡើយទេ បើទោះបីជាលោក Trump បានសន្យាម្តងហើយម្តងទៀតថា នឹងសម្រេចកិច្ចព្រមព្រៀងមួយឆាប់ៗក៏ដោយ។ សម្ព័ន្ធមិត្តអឺរ៉ុបរបស់អ៊ុយក្រែន បារម្ភថា សហរដ្ឋអាមេរិក អាចទាមទារឱ្យអ៊ុយក្រែន ទទួលយកសម្បទានទឹកដី។

ប្រេសិតរបស់លោក Putin គឺលោក Kirill Dmitriev បាននិយាយថា «កិច្ចសន្ទនាមានលក្ខណៈស្ថាបនា ហើយមនុស្សកាន់តែច្រើនឡើងៗ យល់ដឹងពីភាពយុត្តិធម៌នៃជំហររបស់រុស្ស៊ី»។ ការអត្ថាធិប្បាយនេះធ្វើឡើងបន្ទាប់ពីកិច្ចពិភាក្សាជាមួយប្រេសិតរបស់លោក Trump គឺលោក Steve Witkoff និងកូនប្រសាររបស់លោក Trump គឺលោក Jared Kushner នៅក្នុង «វិមានសហរដ្ឋអាមេរិក» (USA House) ដែលជានិវេសនដ្ឋានសម្រាប់គណៈប្រតិភូនៅទីក្រុងដាវ៉ូស។

លោក Witkoff បានប្រាប់ទីភ្នាក់ងារសារព័ត៌មាន RIA របស់រុស្ស៊ីថា «ភាគីទាំងពីរបានធ្វើកិច្ចប្រជុំមួយដែលមានភាពវិជ្ជមានខ្លាំងណាស់»។ ក្រុមមេដឹកនាំអ៊ុយក្រែន និងអឺរ៉ុប និយាយថា ពួកគេមិនអាចអនុញ្ញាតឱ្យរុស្ស៊ី សម្រេចគោលបំណងរបស់ខ្លួនបានទេ បន្ទាប់ពីអ្វីដែលពួកគេបានចាត់ទុកថាជា «ការដណ្តើមយកទឹកដីបែបអធិរាជ»៕