រដ្ឋាភិបាលប្រទេសស៊ីរី និងកងកម្លាំងប្រជាធិបតេយ្យស៊ីរី(SDF) ដឹកនាំដោយក្រុមឃឺដ បានព្រមព្រៀងលើបទឈប់បាញ់ថ្មីមួយកាលពីថ្ងៃអង្គារ ទី២០ ខែមករា ខណៈទីក្រុងវ៉ាស៊ីនតោនបាននិយាយថា គោលបំណងរបស់កងកម្លាំងប្រជាធិបតេយ្យស៊ីរី(SDF) ក្នុងការប្រយុទ្ធប្រឆាំងក្រុមជីហាដរដ្ឋអ៊ីស្លាមភាគច្រើនត្រូវបានបញ្ចប់។

សេចក្តីប្រកាសនេះ ធ្វើឡើងបន្ទាប់ពីកងទ័ពបានបញ្ជូនកម្លាំងបន្ថែមទៅកាន់ទីតាំងលាក់ខ្លួននៅខេត្ត Hasakeh របស់ក្រុមឃឺដនៅភាគឦសាន ហើយកងកម្លាំងឃឺដបានដកខ្លួនថយចេញពីជំរំ Al-Hol ដែលផ្តល់ទីជម្រកដល់មនុស្សរាប់ពាន់នាក់ដែលត្រូវបានសង្ស័យថាមានទំនាក់ទំនងជាមួយក្រុមរដ្ឋអ៊ីស្លាម(IS) រួមមានទាំងស្ត្រី និងកុមារបរទេសផងដែរ។

បទឈប់បាញ់ចុងក្រោយនេះ បើកផ្លូវសម្រាប់ការចរចាបន្ថែមទៀតលើកិច្ចព្រមព្រៀងដែលបានប្រកាសរវាងប្រធានាធិបតី លោក Ahmed al-Sharaa និងប្រមុខកងកម្លាំងប្រជាធិបតេយ្យស៊ីរី(SDF) លោក Mazloum Abdi ដែលរួមមានការធ្វើសមាហរណកម្មរដ្ឋបាលស្វយ័តរបស់ក្រុមឃឺដទៅក្នុងរដ្ឋ។

កងកម្លាំងប្រជាធិបតេយ្យស៊ីរី(SDF) ធ្លាប់បានគ្រប់គ្រងតំបន់ដ៏ធំល្វឹងល្វើយនៅភាគខាងជើង និងខាងកើតប្រទេសស៊ីរី ដែលខ្លួនដណ្តើមយកបានដោយការប្រយុទ្ធប្រឆាំងជាមួយក្រុមរដ្ឋអ៊ីស្លាម(IS) មានការគាំទ្រពីក្រុមចម្រុះអន្តរជាតិដឹកនាំដោយសហរដ្ឋអាមេរិក។

ប៉ុន្តែពេលនេះពួកគេបានដកថយចេញពីខេត្ត Raqa និងខេត្ត Deir Ezzor ដែលមានប្រជាជនភាគច្រើនជាពលរដ្ឋអារ៉ាប់ បន្ទាប់ពីការកើនឡើងយោធារបស់រដ្ឋាភិបាលដែលបានចាប់ផ្តើមនៅទីក្រុង Aleppo កាលពីដើមខែនេះ។