រតនគិរី៖ សហគមន៍បងប្អូនជនជាតិដើមភាគតិចគ្រឹង ស្ថិតក្នុងស្រុកអូរជុំ ខេត្តរតនគិរី បាន​បង្ហាញ​ការ​សប្បាយ​រីករាយ ដែលទទួលបានបណ្ណកម្មសិទ្ធិដីសមូហភាពពីរាជរដ្ឋាភិបាល ដើម្បី​អាច​កាន់​កាប់​ដី​ដូន​តា​ដោយ​ស្រប​ច្បាប់ ហើយអាចអាស្រ័យផលបានតកូនតចៅ។

ក្នុងឱកាសអញ្ជើញប្រគល់បណ្ណកម្មសិទ្ធិដីសមូហភាព ជូនជនជាតិដើមភាគតិចគ្រឹង នៅឃុំប៉ូយ ស្រុក​អូជុំ ខេត្តរតនគិរី គម្រោងបែងចែកដីដើម្បីសង្គមកិច្ច និងការ​អភិវ​ឌ្ឍ​សេដ្ឋកិច្ច​ដំណាក់​កាល​ទី៣​ (LASED III) នៅថ្ងៃទី២១ ខែមករា ឆ្នាំ២០២៦ ឯកឧត្តម សាយ សំអាល់ ឧប​នាយក​រដ្ឋ​មន្ត្រី ​រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ មានប្រសាសន៍ថា សូម​បង​ប្អូន​ជន​ជាតិ​ដើម​ភាគ​តិច​ ត្រូវរក្សា និងប្រើប្រាស់បណ្ណ ដែលទទួលបាននាពេលនេះឱ្យបានត្រឹមត្រូវ ហើយ​ទៅ​មុខទៀត សូមងាកមកគិតគូរលើការកសាងខឿនសេដ្ឋកិច្ច អភិវឌ្ឍន៍សហគមន៍ និង​រៀប​ចំ​ភូមិ​ឋាន​ឱ្យកាន់តែប្រសើរឡើង ទាក់ទាញភ្ញៀវទេសចរមកកម្សាន្ត​ លើក​ស្ទួយ​ជីវភាពគ្រួសារ​​នៅ​ភូមិ​​ភាគ​ឦសាន​ឱ្យ​កាន់​តែរីកចម្រើនទៅមុខ ។

ឯកឧត្តមឧបនាយករដ្ឋមន្ត្រី បានបន្តថា ការប្រគល់​បណ្ណ​ជូន​បង​ប្អូន​ជន​ជាតិ​ដើម​ភាគ​តិច​នា​ពេល​នេះ ​មិនត្រឹមតែជាការប្រគល់បណ្ណសមូហភាព និងការធានាបាននូវសុវត្ថិភាពផ្លូវច្បាប់ ក្នុង​ការ​កាន់​កាប់​អចលន​ទ្រព្យប៉ុណ្ណោះទេ តែសំដៅបញ្ចប់ភាពមន្ទិលលើការកាន់កាប់អចលនទ្រព្យ រវាង​ដី​ឯក​ជន និងសមូហភាពរបស់បងប្អូនជនជាតិដើមភាគតិច ក៏ដូចជាបញ្ចប់មន្ទិលភ្នាក់ងារ របស់​អង្គ​ការ​សហ​ប្រជាជាតិ និងធនាគារពិភពលោក ពីសុវត្ថិភាពក្នុងការកាន់កាប់ដីធ្លី របស់​បង​ប្អូន​ជន​ជាតិ​ដើម​ភាគតិច។

ឯកឧត្តម បានបន្ថែមថា ម្យ៉ាងទៀត នេះក៏បានបង្កើនភាពជឿជាក់ និងងាយស្រួល​ទៅដ​ល់​ធនាគារ ​និងមីក្រូហិរញ្ញវត្ថុ ក្នុងការវាយតម្លៃអចលទ្រព្យរបស់ជនជាតិដើមភាគតិច ឬ​​ដី​សមូហ​ភាព​របស់​បងប្អូនជនជាតិដើមភាគតិចផងដែរ ។

ក្នុងពេលទៅទទួលបណ្ណកម្មសិទ្ធិដីសមូហភាព បងប្អូនជនជាតិដើមភាគតិចគ្រឹង បានបង្ហាញក្តី​រី​ករា​យ​ ដែលទទួលបានកម្មសិទ្ធិដីកាន់កាប់ស្របច្បាប់ លែងភ័យខ្លាច​មានអ្នកមករំលោភបំពាន ហើយ​អរគុណរាជរដ្ឋាភិបាល ដែលបានគិតគូរដល់ជនជាតិដើមភាគតិច នៅគ្រប់តំបន់ ទាំង​ការ​កសាង​នូវហេដ្ឋារចនាសម្ព័ន្ធនានា ក្នុងមូលដ្ឋានពួកគាត់រស់នៅ ហើយបាន​ធ្វើ​បណ្ណ​កម្ម​សិទ្ធិ​ដី​ធ្លី​ដែល​ចង់​បាន​ជាយូរហើយនោះ។

គួរបញ្ជាក់ថា សហគមន៍ទទួលបានបណ្ណកម្មសិទ្ធិដីសមូហភាព មានចំនួន ៥ភូមិ ក្នុង​នោះ​មាន​ភូមិ​ខ្មែង ភូមិស្វាយ ភូមិធួយទុំ ភូមិកាំផ្លិញ និងភូមិប៉ាអរ។ ក្នុងថ្ងៃដដែល ឯកឧត្តម​ឧប​នាយក​រដ្ឋ​មន្ត្រី ​សាយ សំអាល់ និងម្ចាស់គម្រោង បានចុះពិនិត្យសមិទ្ធិផលនៅសហគមន៍ជនជាតិភាគតិច មាន​ដូចជា៖ សាលារៀន អណ្ដូងទឹក ផ្លូវបេតុង ផ្លូវក្រួសក្រហម និងប៉ុស្ដិ៍សុខភាព ក្នុងគម្រោង​បែង​ចែក​ដី​ដើម្បីសង្គមកិច្ច និងការអភិវឌ្ឍសេដ្ឋកិច្ច ដំណាក់កាលទី៣ ស្ថិតនៅភូមិតាង៉ាច និង​ភូមិ​កង​កុយ នៃឃុំប៉ូយ ៕ អត្ថបទ៖ បាន សុខរិទ្ធិ