ប្រធានាធិបតីកូរ៉េខាងត្បូង លោក Lee Jae Myung នៅថ្ងៃពុធ (ទី២១ ខែមករា ឆ្នាំ២០២៦) នេះ បានបញ្ជាក់ថា ប្រសិនបើទីក្រុងវ៉ាស៊ីនតោន បានដាក់អត្រាពន្ធរបស់សហរដ្ឋអាមេរិកខ្ពស់ទៀត លើការនាំចូលបន្ទះឈីប វាទំនងជានឹងធ្វើឲ្យតម្លៃនៅសហរដ្ឋអាមេរិកឡើងខ្ពស់ ដោយបាននិយាយសម្រាលនូវក្ដីបារម្ភ អំពីការស្នើឲ្យដាក់កាតព្វកិច្ចពន្ធ ១០០ភាគរយ។

រដ្ឋមន្ត្រីក្រសួងពាណិជ្ជកម្មអាមេរិក លោក Howard Lutnick បាននិយាយថា ក្រុមហ៊ុនផលិតបន្ទះឈីបរបស់កូរ៉េខាងត្បូង និងកោះតៃវ៉ាន់ អាចប្រឈមជាមួយអត្រាពន្ធរហូតដល់ ១០០ភាគរយ ប្រសិនបើពួកគេមិនប្តេជ្ញាចិត្តបង្កើនផលិតកម្ម នៅលើទឹកដីរបស់សហរដ្ឋអាមេរិកទេនោះ។

លោក Lee បានលើកឡើងថា ដោយក្រុមហ៊ុនផលិតបន្ទះឈីបកូរ៉េខាងត្បូង និងកោះតៃវ៉ាន់ ក្ដោបក្ដាប់លើទីផ្សារ ពន្ធនាំចូល ១០០ភាគរយរបស់សហរដ្ឋអាមេរិក ទំនងជានឹងធ្វើឲ្យតម្លៃផលិតផលបន្ទះឈីប នៅសហរដ្ឋអាមេរិកឡើងខ្ពស់ខ្លាំង។

លោកបានប្រាប់សន្និសីទសារព័ត៌មានមួយថា៖ «ពួកគេ (ក្រុមហ៊ុន) ក្ដោបក្ដាប់ទីផ្សារពី ៨០ភាគរយ ទៅ ៩០ភាគរយ។ ដូច្នេះ ភាគច្រើននៃការដំឡើងនោះ ទំនងជាធ្វើឲ្យប៉ះពាល់ដល់តម្លៃ នៅសហរដ្ឋអាមេរិក»។

លោក Lee បានបន្ថែមថា កូរ៉េខាងត្បូងមានវិធានការការពាររួចហើយ ក្រោមកិច្ចព្រមព្រៀងពាណិជ្ជកម្មជាមួយសហរដ្ឋអាមេរិក ដើម្បីធានាបានថា ក្រុមហ៊ុនផលិតបន្ទះឈីបរបស់ខ្លួន នឹងមិនត្រូវបានធ្វើឲ្យស្ថិតក្នុងស្ថានភាពមិនអំណោយផល ធៀបនឹងកោះតៃវ៉ាន់ ឬដៃគូប្រកួតប្រជែងសកលផ្សេងទៀត។

គួរបញ្ជាក់ថា ការនាំចេញរបស់កូរ៉េខាងត្បូង បានឡើងដល់កម្រិតខ្ពស់បំផុត ៧០៩,៤ពាន់លានដុល្លារ ក្នុងឆ្នាំ២០២៥ ដោយកើន ៣,៨ភាគរយ ពីទំហំឆ្នាំ២០២៤ ខណៈដែលការដឹកជញ្ជូនបន្ទះឈីប បានហក់ឡើង ២២ភាគរយ ដោយសារតែការមានតម្រូវការខ្លាំង សម្រាប់ការវិនិយោគបញ្ញាសិប្បនិម្មិត (AI)៕