យ៉ាងហោចណាស់មនុស្ស ៤នាក់បានបាត់បង់ជីវិត កាលពីថ្ងៃអង្គារ (ទី២០ ខែមករា ឆ្នាំ២០២៦) ខណៈដែលទឹកជំនន់ បានកើតមាននៅទូទាំងតំបន់ជាច្រើននៃប្រទេសទុយនីស៊ី បន្ទាប់ពីទឹកភ្លៀង បានធ្លាក់ខ្លាំងបំផុតជាលើកដំបូង ក្នុងរយៈពេលជាង ៧០ឆ្នាំ នៅក្នុងតំបន់មួយចំនួន ហើយគេបារម្ភថា ចំនួនអ្នកស្លាប់ អាចកើនឡើងទៀត។ នេះបើយោងតាមការឲ្យដឹងពីអាជ្ញាធរ។

ភ្លៀងធ្លាក់ខ្លាំងភ្លាមៗ បានបង្កជាទឹកជំនន់ជន់លិចផ្លូវថ្នល់ ធ្វើឲ្យយានយន្តលិចក្នុងទឹក និងរំខានដល់ជីវិតប្រចាំថ្ងៃ នៅក្នុងខេត្តជាច្រើននៃប្រទេសអាហ្វ្រិកខាងជើងមួយនេះ ដោយទីភ្នាក់ងារសង្គ្រោះបន្ទាន់ កំពុងជួបការលំបាកក្នុងការឆ្លើយតបទៅនឹងទំហំនៃទឹកជំនន់នេះ។

ក្រុមការពារជនស៊ីវិល បានឲ្យដឹងថា តំបន់ជាច្រើនត្រូវបានកាត់ផ្តាច់ដោយសារទឹកឡើងខ្លាំង ជាពិសេសនៅតំបន់ទំនាប។ សាលារៀនត្រូវបានបិទ នៅក្នុងរដ្ឋធានី Tunis ក៏ដូចជានៅទីក្រុង Nabeul, Sousse និង Beja ហើយដំណើរការនៅតុលាការ ត្រូវបានផ្អាក ខណៈការដឹកជញ្ជូនសាធារណៈ និងឯកជន ត្រូវបានប៉ះពាល់យ៉ាងធ្ងន់ធ្ងរនៅក្នុងតំបន់ខ្លះ។

វីដេអូដែលបានចែករំលែកនៅលើបណ្ដាញសង្គម បានបង្ហាញឲ្យឃើញពីទឹកជំនន់ហូរខ្លាំងនាំយកកម្ទេចកម្ទីកាត់ផ្លូវលំនៅឋាន ដោយទឹកសមុទ្រជន់លិចតំបន់នានា នៅក្នុងទីក្រុងឆ្នេរ Menzel Temime។ មន្ត្រីឧតុនិយម បានឲ្យដឹងថា កម្រិតទឹកភ្លៀងនៅក្នុងតំបន់មួយចំនួន គឺជាកម្រិតខ្ពស់បំផុត គិតចាប់តាំងពីឆ្នាំ១៩៥០ មក៕