ប្រមុខអង្គការណាតូ (NATO) លោក Mark Rutte នៅថ្ងៃពុធ (ទី២១ ខែមករា ឆ្នាំ២០២១) បានលើកឡើងថា «ការទូតដ៏ល្អិតល្អន់» គឺត្រូវការជាចាំបាច់ ដើម្បីដោះស្រាយភាពតានតឹង ជុំវិញបញ្ហា Greenland ខណៈដែលប្រធានាធិបតី លោក Donald Trump បានធ្វើដំណើរឆ្ពោះទៅកាន់ទីក្រុង Davos ប្រទេសស្វីស ដើម្បីជំរុញការទាមទាររបស់សហរដ្ឋអាមេរិក ពាក់ព័ន្ធនឹងដែនដីនេះ។

លោក Rutte បាននិយាយនៅឯវេទិកាសេដ្ឋកិច្ចពិភពលោក (WEF) ថា៖ «ខ្ញុំយល់ថា មានភាពតានតឹងច្បាស់ណាស់ នាពេលនេះ ពោលគឺគ្មានអ្វីគួរឲ្យសង្ស័យឡើយ។ ជាថ្មីម្តងទៀត ខ្ញុំមិនធ្វើអត្ថាធិប្បាយលើបញ្ហានេះនោះទេ ប៉ុន្តែខ្ញុំអាចធានាចំពោះអ្នកទាំងអស់គ្នាថា មធ្យោបាយតែមួយគត់ ដើម្បីដោះស្រាយបញ្ហានេះនោះ នៅទីបំផុត គ្មានអ្វីក្រៅពីការទូតដែលត្រូវបានពិចារណាយ៉ាងល្អិតល្អន់ឡើយ។ សូមអ្នកទាំងអស់គ្នាជឿជាក់ចុះថា ខ្ញុំកំពុងធ្វើការលើបញ្ហានេះ នៅពីក្រោយឆាក ប៉ុន្តែខ្ញុំមិនអាចប្រកាសវាជាសាធារណៈបានទេ»។

លោក Rutte នឹងជួបជាមួយលោក Trump នៅទីក្រុងរមណីយដ្ឋានជិះស្គីរបស់ប្រទេសស្វីស ខណៈដែលការជំរុញរបស់លោកប្រធានាធិបតី ក្នុងការដណ្ដើមគ្រប់ដែនដី Greenland ពីប្រទេសដាណឺម៉ាក បានធ្វើឲ្យអង្គការណាតូរង្គោះរង្គើ។ លោកបានព្យាយាមបង្វែរចំណាប់អារម្មណ៍របស់លោក Trump ចំពោះទឹកដីពាក់កណ្ដាលស្វយ័តរបស់ដាណឺម៉ាកនេះ ទៅជាការពិភាក្សាដ៏ទូលំទូលាយមួយ នៅអង្គការណាតូ ស្តីពីការពង្រឹងសន្តិសុខនៅតំបន់អាក់ទិក។

ជាមួយគ្នានេះ លោក Rutte បានច្រានចោលក្ដីបារម្ភ ដែលថា វិបត្តិ ជុំវិញកោះ Greenland នេះ អាចបណ្តាលឲ្យសម្ព័ន្ធភាពយោធាអាយុកាល ៧៦ឆ្នាំនេះដួលរលំ៕