មណ្ឌលគិរី៖ បងប្អូនជនជាតិដើមភាគតិចព្នង ដែលកំពុងរស់នៅជាសហគមន៍ ស្ថិត​ក្នុង​ខេត្ត​មណ្ឌល​គិរី ​បានបង្ហាញការសប្បាយរីករាយ នៅ​ពេល​ទទួល​បាន​បណ្ណ​កម្ម​សិទ្ធិ​ដី​សមូហភាព​ពី​រាជ​រដ្ឋាភិបាល ដើម្បីអាស្រ័យផល និងការប្រតិបត្តិទំនៀមទម្លាប់តជំនាន់ពីដូនតាជាដើម ។

ក្នុងឱកាស អញ្ជើញប្រគល់បណ្ណកម្មសិទ្ធិដីសមូហភាព ដល់បងប្អូនជនជាតិដើមភាគតិចព្នង ស្ថិត​ក្នុង​ភូមិ​ឡាំម៉េះ ឃុំប៊ូស្រា ស្រុកពេជ្រាដា ស្ថិតក្នុងគម្រោងបែងចែកដីសម្បទានដើម្បីសង្គម និង​សេដ្ឋកិច្ច ដំណាក់កាលទី៣ (LASED III) នៅរសៀលថ្ងៃទី២១ ខែមករា ឆ្នាំ២០២៦ ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ មាន​ប្រសាសន៍​ថា ជាការពិត ក្រៅពីការប្រគល់បណ្ណសមូហភាព ជូនដល់បងប្អូនជនជាតិដើមភាគតិច លើស​ពី​នេះ គឺការបញ្ចប់ភាពមិនប្រាកដប្រជា លើការកាន់កាប់អចលនទ្រព្យរវាងដីឯកជន និង​សមូ​ហ​ភាពរបស់បងប្អូនជនជាតិដើមភាគតិច ព្រមទាំងបញ្ចប់មន្ទិល និងកង្វល់​ភ្នាក់​ងារ​របស់​អង្គ​ការ​សហ​ប្រជាជាតិ និងធនាគារពិភពលោក ពីសុវត្ថិភាព​ក្នុង​ការ​កាន់​កាប់​ដី​ធ្លី​របស់​បង​ប្អូន​ជន​ជាតិ​ដើម​ភាគតិច។

ឯកឧត្តម បានបន្តថា ជាមួយគ្នានេះ ក៏ជាការបង្កើនភាពជឿជាក់ និងងាយស្រួលទៅដល់ធនាគារ និង​មីក្រូហិរញ្ញវត្ថុ ក្នុងការវាយតម្លៃអចលទ្រព្យរបស់ជនជាតិដើមភាគតិច ឬដី​សមូហ​ភាព​របស់​ជន​ជាតិ​ដើម​ភាគ​តិច ដែលមានកម្មសិទ្ធិដីសមូហភាព។

ឯកឧត្តម​ឧបនាយករដ្ឋមន្ត្រី បានបន្ថែមថា ទៅមុខទៀត សូមបងប្អូន​ចូលរួម​ជាមួយ​គ្នា​ងាក​​ម​កគិត​គូរ​លើ​ការកសាងខឿនសេដ្ឋកិច្ច មុខងារសេដ្ឋកិច្ច ដោយផ្តោតលើមុខរបរ និងប្រាក់ចំណូល ការ​ដាំ​ដុះ ​ការចិញ្ចឹមសត្វ អភិវឌ្ឍន៍សហគមន៍ រៀបចំហេដ្ឋារចនាសម្ព័ន្ធចាំបាច់នានា និងរៀប​ចំ​នូវ​ភូមិ​ឋាន​ឱ្យ​កាន់តែប្រសើរឡើង ដើម្បីលើកស្ទួយជីវភាពប្រជាពលរដ្ឋ និងកែប្រែ​សង្គម​ជាតិ​ឱ្យ​កាន់​តែ​រីក​ចម្រើន​ទៅមុខ។ ដោយក្រសួងរៀបដំដែនដី និងម្ចាស់គម្រោង នៅតែបន្តជួយដល់ការ​កសាង​ហេដ្ឋា​រចនាសម្ព័ន្ធ និងការបណ្ដុះបណ្ដាលជំនាញកសិកម្មជាដើម ។

ក្នុងពេលទៅ​ទទួលបណ្ណកម្មសិទ្ធិដីសមូហភាព លោក ឡុង ឡឹល ប្រធានសហគមន៍​ជន​ជាតិ​ដើម​ភាគ​តិច​ព្នង ដែលមានសមាជិកចំនួន ៤៦៩នាក់ ស្ថិតនៅក្នុងភូមិឡាំម៉េះ បង្ហាញក្តីរីករាយ នៅ​ពេល​រាជ​រដ្ឋាភិបាលកម្ពុជា បានគិតគូរពីបងប្អូនជនជាតិដើមភាគតិច បានកសាង​នូវ​ហេដ្ឋា​រចនា​សម្ព័ន្ធ​នានា ដើម្បីបម្រើដល់ការរស់នៅរបស់ពួកគាត់ ហើយមិនត្រឹមប៉ុណ្ណោះ នៅឆ្នាំ២០២៦នេះ បានផ្ដល់នូវបណ្ណកម្មសិទ្ធិដីសមហូភាព គឺកាន់តែធ្វើឲ្យពួកគាត់មានភាពកក់ក្ដៅ ក្នុង​ការ​កាន់​កាប់​ដី​ដោយស្របច្បាប់ និងលែងភ័យព្រួយបារម្ភ ពីការរំលោភបំពាន ។

ឯកឧត្តម ថង សាវុន អភិបាលខេត្តមណ្ឌលគិរី បានថ្លែងថា រហូតមកដល់ពេលនេះ នៅក្នុង​ខេត្ត​មណ្ឌល​គិរី មានសហគមន៍ជនជាតិដើមភាគតិច បានដាក់ពាក្យស្នើសុំចុះបញ្ជីដីសរុបចំនួន ២៧​សហគមន៍។

គួរបញ្ជាក់ថា រាជរដ្ឋាភិបាលកម្ពុជា មិនត្រឹមតែបានទទួលស្គាល់ បងប្អូនជនជាតិ​ដើម​ភាគ​តិច​ជា​ជន​ជាតិ​ដើម​ភាគតិចប៉ុណ្ណោះទេ គឺតែងតែបានគោរព លើកតម្កើងវប្បធម៌អរិយធម៌ និងទំនៀម​ទម្លាប់​ប្រពៃណី របស់បងប្អូនជនជាតិដើមភាគតិច រួមទាំងការធ្វើសមាហរណកម្មទាំងសង្គម សេដ្ឋកិច្ច និងនយោបាយជូនដល់ពួកគាត់ ព្រោះកម្ពុជា គឺជាសង្គមពហុវប្បធម៌ មិនមាន​ការ​រើស​អើង៕ អត្ថបទ បាន សុខរិទ្ធិ