យោងតាមសារព័ត៌មាន Reuters អ៊ីស្រាអែលបានទម្លាក់ខិត្តប័ណ្ណនៅភាគខាងត្បូងតំបន់ហ្កាហ្សា ដោយបញ្ជាឱ្យគ្រួសារប៉ាឡេស្ទីនរាប់សិបគ្រួសារចាកចេញពីផ្ទះរបស់ពួកគេ ដែលជាការជម្លៀសដោយបង្ខំលើកដំបូងចាប់តាំងពីបទឈប់បាញ់ដ៏ផុយស្រួយបានចូលជាធរមានក្នុងខែតុលា ឆ្នាំមុន ។

របាយការណ៍នេះបានពីក្រុមអ្នកស្រុកនៅតំបន់ Bani Suhaila ភាគខាងកើតទីក្រុង Khan Yunis ដោយនិយាយថាខិត្តប័ណ្ណទាំងនោះត្រូវបានទម្លាក់កាលពីថ្ងៃចន្ទដើមសប្ដាហ៍នេះទៅលើគ្រួសារដែលរស់នៅក្នុងជំរំតង់លើសង្កាត់ Al-Reqeb ក្នុងទីប្រជុំជន Bani Suhaila។

ខិត្តប័ណ្ណសរសេរជាភាសាអារ៉ាប់ ហេព្រូ និងអង់គ្លេស បានបញ្ជាក់ថា «សារបន្ទាន់។ តំបន់នេះស្ថិតនៅក្រោមការគ្រប់គ្រងរបស់កងទ័ពអ៊ីស្រាអែល ។ អ្នកត្រូវតែជម្លៀសចេញជាបន្ទាន់»។

បទឈប់បាញ់សម្របសម្រួលដោយសហរដ្ឋអាមេរិកត្រូវបានអនុវត្តចាប់តាំងពីខែតុលាឆ្នាំមុន ក្រោមផែនការសន្តិភាព២០ ចំណុចរបស់ប្រធានាធិបតីអាមេរិក Donald Trump សម្រាប់តំបន់នេះ។ ចាប់តាំងពីពេលនោះមក អ៊ីស្រាអែលនៅតែបន្តរំលោភលើបទឈប់បាញ់ ដោយបានសម្លាប់ជនជាតិប៉ាឡេស្ទីន៤៦៦ នាក់ និងធ្វើឱ្យមនុស្ស ១.២៩៤ នាក់របួស។

យោងតាមរបាយការណ៍ កងទ័ពអ៊ីស្រាអែលបានបដិសេធចំពោះការបញ្ជាឱ្យគ្រួសារនានាជម្លៀសចេញ ផ្ទុយទៅវិញអះអាងថាខិត្តប័ណ្ណទាំងនោះមានបំណងព្រមានប្រជាជនប៉ាឡេស្ទីនកុំឱ្យឆ្លងកាត់អ្វីដែលហៅថាខ្សែបន្ទាត់លឿង។

លោក Ismail Al-Thawabta នាយកការិយាល័យប្រព័ន្ធផ្សព្វផ្សាយរដ្ឋាភិបាលហ្កាហ្សាបានប្រាប់ សារព័ត៌មាន Reuters ថាមនុស្សប្រហែល៣.០០០នាក់ បានរងផលប៉ះពាល់ដោយបទបញ្ជាជម្លៀសចេញ៕