លោក Donald Trump បាននិយាយថា លោក Vladimir Putin និងលោក Volodymyr Zelenskyy នឹងក្លាយជាមនុស្សឆោតល្ងង់ ដែលមិនយល់ព្រមលើកិច្ចព្រមព្រៀងសន្តិភាព ខណៈលោកកំពុងថ្លែងនៅទីក្រុង Davos ។

ថ្លែងនៅក្នុងវេទិកាសេដ្ឋកិច្ចពិភពលោកនៅប្រទេសស្វីស លោក Trump បានបញ្ជាក់ថា លោកនឹងជួបលោក Zelenskyy នៅពេលក្រោយថ្ងៃដដែលនោះ ទោះបីជាមេដឹកនាំអ៊ុយក្រែនបាននិយាយកាលពីថ្ងៃអង្គារថា លោកនឹងមិនចូលរួមព្រឹត្តិការណ៍ទីក្រុង Davos ដើម្បីត្រួតពិនិត្យកិច្ចខិតខំប្រឹងប្រែងស្តារថាមពល និងកម្ដៅនៅរដ្ឋធានី Kyiv ឡើងវិញ ខណៈរុស្ស៊ីកំពុងបង្កើនការវាយប្រហាររបស់ខ្លួនលើហេដ្ឋារចនាសម្ព័ន្ធថាមពលក៏ដោយ។

លោក Trump បាននិយាយថា លោកជឿថាពួកគេអាចមកជាមួយគ្នា ហើយទទួលបានកិច្ចព្រមព្រៀងមួយ។ប្រសិនបើពួកគេមិនធ្វើទេ ពួកគេឆោតល្ងង់ណាស់ នោះជារឿងរបស់ពួកគេទាំងពីរ។

លោក Steve Witkoff បេសកជនសហរដ្ឋអាមេរិក បាននិយាយថា លោក និងលោក Jared Kushner នឹងធ្វើដំណើរទៅកាន់ប្រទេសរុស្ស៊ីនៅថ្ងៃព្រហស្បតិ៍នេះ ដើម្បីពិភាក្សាជាមួយប្រធានាធិបតី Vladimir Putin លើសំណើចុងក្រោយបំផុតសម្រាប់ផែនការសន្តិភាពដើម្បីបញ្ចប់សង្គ្រាមនៅអ៊ុយក្រែន។

លោក Steve Witkoff បាននិយាយថា លោកនឹងជួបលោក Putin នៅថ្ងៃព្រហស្បតិ៍នេះ តាមការស្នើសុំរបស់ភាគីរុស្ស៊ី៕ 

លោក Zelenskyy បាននិយាយថា ៦០%នៃរដ្ឋធានី Kyiv នៅតែគ្មានអគ្គិសនីកាលពីថ្ងៃពុធសប្ដាហ៍នេះ ហើយផ្ទះរាប់ពាន់ខ្នងនៅតែគ្មានម៉ាស៊ីនកម្តៅ។ លោកបានរាយការណ៍ថា ការវាយប្រហារដ៏ធំមួយរបស់រុស្ស៊ីកាលពីថ្ងៃអង្គារបានធ្វើឱ្យមនុស្សជាងមួយលានគ្រួសារក្នុងរដ្ឋធានីគ្មានអគ្គិសនីប្រើប្រាស់៕