ការវាយប្រហារតាមអាកាសរបស់អ៊ីស្រាអែល បានបង្កឲ្យមនុស្ស ១៩នាក់ រងរបួស នៅភាគខាងត្បូងប្រទេសលីបង់ កាលពីថ្ងៃពុធ ក្នុងនោះមានអ្នកសារព័ត៌មាន ៨នាក់។ នេះបើយោងតាមក្រសួងសុខាភិ បាលសាធារណៈលីបង់។

ទីភ្នាក់ងារសារព័ត៌មានជាតិលីបង់ បានរាយការណ៍ថា ការវាយប្រហារទាំងនោះ បានកំណត់គោលដៅទៅលើទីក្រុង និងភូមិជាច្រើន រួមទាំងទីក្រុង Qennarit ជាកន្លែងដែលការទម្លាក់គ្រាប់បែកដ៏ខ្លាំងក្លា បានបំផ្លាញ អគារ ៧ខ្នង បន្ទាប់ពីកងកម្លាំងអ៊ីស្រាអែល បានចេញការព្រមានឲ្យប្រជាជនជម្លៀសចេញ នៅព្រឹកព្រលឹមថ្ងៃពុធ។

ប្រព័ន្ធផ្សព្វផ្សាយក្នុងស្រុក បានរាយការណ៍ថា អ្នកកាសែត ៨នាក់ បានរងរបួស ខណៈពេលកំពុងយកព័ត៌មានអំពីការវាយប្រហារនេះ។ យោធាអ៊ីស្រាអែលមិនទាន់បានធ្វើអត្ថាធិប្បាយលើរបាយការណ៍នេះ នៅឡើយទេ។

មជ្ឈមណ្ឌលប្រតិបត្តិការសង្គ្រោះបន្ទាន់របស់ក្រសួងសុខាភិបាល បាននិយាយនៅក្នុងសេចក្តីថ្លែងការណ៍មួយថា អ្នករងរបួសរួមមានមនុស្ស ពីរនាក់ ត្រូវបានបញ្ជូនទៅថែទាំយ៉ាងយកចិត្តទុកដាក់ បីនាក់ត្រូវបានបញ្ជូនទៅមន្ទីរពេទ្យ និង ១៤នាក់ ត្រូវបានព្យាបាល នៅក្នុងបន្ទប់សង្គ្រោះបន្ទាន់។

ការវាយប្រហារតាមអាកាសបន្ថែមទៀត បានបំផ្លាញអគារជាច្រើន នៅក្នុងទីក្រុង Jarjouaa និង Kfour     ខណៈដែលការវាយប្រហារផ្សេងទៀត ត្រូវបានរាយការណ៍ នៅក្នុងភូមិ Kharayeb និង Ansar។

ប្រធានាធិបតីលីបង់ លោក Joseph Aoun បានចោទអ៊ីស្រាអែលពីបទបន្តគោលនយោបាយឈ្លានពានជាប្រព័ន្ធប្រឆាំងនឹងភូមិដែលមានមនុស្សរស់នៅ ដោយបានថ្កោលទោសការវាយប្រហារនេះថា ជាការរំលោភលើបទឈប់បាញ់ និងច្បាប់អន្តរជាតិ ហើយបានអំពាវនាវឲ្យសហគមន៍អន្តរជាតិធ្វើអន្តរាគមន៍៕